ika mu

 mamigunam@siwalangsinukuan

 

ika mu
— augusto m. reyes

Ika mu, ala na kening pusu sinta
Napun ampo ngeni at king daratang pa
E ka maligalig at e ka magduda
Miwale ku man at mikanlaut kata
Tabak mu king batu kaluguran daka.

Potang damdaman mu itang kapalsimian
At biling-biling ka king kekang pagkeran
Isiping me keka ing kakung larawan
Lawen meng maratna at pakapagmasdan
Ban ing pigagap mu mirinan kapaldan.

Sukad dayat malat man ing pilatan ta
E ya iti sangkan ban kalinguan daka
Bagkus ‘ya ing sukad labis pa kanita
Ning kapalsintan a mibuklud kekata
At lugud ku kekang manggang alang angga.

Ika mung tagana keni king pusu ku
Ala nang ninu pang makibandi kaku
Datang ya man kaku ing nanu mang tuksu
At sugira’naku tibe at prinsipyu
E na ku ayagyag mengari kung santu!

Ika mung sinta ku ala nang aliwâ
Pulisan mu no reng kekang matang luluâ
Tumima’naka at e naka gagagâ
Misulu kata king ligaya at túlâ
Kalupa na nitang minuna’t samulâ.

 

---