silaban la reng bangka

27/12/2018

timauang paniulat

mosicus; magmosicus@siwalangsinukuan

magmartia@siwalangsinukuan

 

silaban la reng bangka
pusung capampangan

 

digmaan; sagupaan@siwalangsinukuan

I Renatu mayap yang ukbu. Metung kareng sundalus keyakitan gelingan. Bayu ya pamung lub aburyan dane dening matas a opisyal. Bukud keng atin yang masiglang pamikakatawan, mapamintu ya i Renatu. Nanu mang miyatang a obra kaya, masalese nang agagawa. Anya e meluat mitas ya naman rangku at tinalan niya naman batalyun. Anya pati dening atyu sasakupan na apapatuki na la keng nanu man iyatas da karela. Matapang ya at disiplinadu ya i Renatu. Dintang ing aldo pepayawus de keng babo i Renatu para keng maulagang misyun. Uli’ng metung kareng pulu a sakup ning bangsa ra asasakup dane dening aliwang nasyun, mikamigit ing atlung bulan a pamanyane miyanda keng pakipamu.

mamangca©siwalangsinukuan

I Renato yang mitalagang Kapitan. Yang maging pamuntuk karing batalyun a sumabak keng giyera. Pati dening balange semasan da na na la, lalaman a dinalan a sundalus. Apulu la reng balange seken para munta karin king pulu. Atlung aldo pamaglayag keng dagat. Kumpletu la karing armas da. Pinandit pa abatyawan da ne ing pulu a sasakupan da na rening daywan. Kabang palapit na lang palapit king bebe ning pasigan, akakit da ne itang bandera ring daywan a matalakad ne. Anyang atyu na la alus lima mung kagpa keng gabun, ikit da la reng mangaragul pang balange palapit karela. Migit king apulung dake ing dakal ding kalabanan da. Anya dakal karening sundalus pakisabyan de ing kapitan a Renatu a mako na lang tambing kabang e la pa miraras dening kapamuk da.

‘Matras ta na mu!’ Gulisak da.

pandi; diua; diua ning pandi@siwalangsinukuan

Manene na lang kinumbinsiyan ning kapitan a e la mamatras at sinabi na karelang agyu da la ren. Angga king inutus ning kapitan a silaban da la rening seken dang bangka. Kanita miras ing pamipamuk uli’ng determinadu na la ngan lumaban. Pinyambut da ing giyera at ing pulu king pasibayu misubli ne karela.

 

 


 

Advertisements

uwa ne?

03/12/2018

timauang paniulat

bombilia

pangamulat@siwalangsinukuan

 

uwa ne?
mai stauros

“Uwa ne?”; “Lauan mu na, ne?”; “Ne malago?”; “E ka mamako, ne?”

Ing “NE”, keraklan apulut ta’ ya kareng Hapon. [O ila ring meka”sikuat” kekatamu?]. Nung makananu ta’ yang gagamitan ing “ne”, makanyan yang makanyan karela mu naman.

Keng Inglis, ing “ne” metung yang “particle” nung ing gamit na yang amanuan tamu pangaras keng pamanyulat o pamagsalita. Maralas, ken’ yang punta o tauli/ sepu [bibili] na ning nanu mang sasambitlan tamu ing “ne”.

Ing “ne” tutuglung ya neng manyawad kang “afirmacion” o manaya kang tanguanan na ca o ayunan o magkumpormi/”conforme” ya keka ing kekang kasabi. Alimbawa: “Kaburi ku kaya! Taganang makapakaili ya, ne?” (I so like her/him. S/he is really funny. Isn’t s/he?)

Pisan neng alang pilatan “NE” y “E wari?”. Keng Tagalug naman, “di ba?” ya, at keng Inglis, “Right?“; “Isn’t it?“; “Am I right?” at marakal pang mamawig kareti.

Ing “ne” sasabian ta’ ya mu naman ban makabalangcas tamung “rhetorical question”– bala mu wari king kukutang ka dapot e na ka man taganang manenayang pakibat o kailangan mipakibatan lalu na nung ing sasambitlan mu malino yang katutuan o caya beluan yang pangmalda o balu da ne reng marakal. Alimbawa: “Kamal da na reng balasenas ampon patatas ngeni, ne?”; o kaya, “Mesakit nang mesakit ing bie ne abe?”; o “Kanayun nang akakit maka-“bikining” Angel Locsin ne?”

Ing “ne” maliari yang gamitan ban kuanan me pansin/”attention” ing metung a tau. Alimbawa: “Kumare, ne! E mu kakalinguan ing fiesta keta kekami ne? Ne?” (Ba lamu, “Hey, listen!” o “Ok?” o “Did you hear me”?)

Ing “ne” metung yang “softener” (It tempers a supposedly hurtful or embarrassing response]. Palambutan ne ing kekang pakibat keng taung e mu buring tanguanan o agpangan mung “negative/no- answer“– ita uari potang papayali ka. Alimbawa: “E ku makatagun keng kasal mu uling mitiempu ya keng viaje ku king London. Panupaya mu rugu ne?” o “Apingas ke rugu balugbug itang indam kung tasa keka. Pasensiya na ka ne?”

Ing “ne” puwedi ya naman neng mumutus ka o atin kang pakisabi o neng buri meng itimid ing papagawa mu. Alimbawa: “Bilisan mung mandlilu, ne?” o “Isara me ing pasbul keng kusina penandit, ne.” o “Tugtugan mo reng tanaman potang sisilim ne.”
E ya sana mesayang ing oras yu keng pamamasa kanini. Ay rugo, ne.

 

—-


UU – OO 

03/12/2018

timauang paniulat

aclat; daclat@siwalangsinukuan

pamagaral@siwalangsinukuan

 

UU – OO 
mai stauros

~
Maralas, nung ‘U’ ya ing tauli nang letra o kakatni (vowel) ning metung a amanu, miyalilan ya iting ‘O’ patse dake (part) ne [iting amanu] ning metung a kutang, lakuas na nung ing pamangutang manenaya ya mung pakibat a ‘WA’ o kaya “ALI’ (if the interrogative sentence is answerable by ‘yes’ or ‘no’); at patse ing pisasabian a amanu, ati yu king sepu na ning taladtad.
`
Mapilan a alimbawa:
`
APU (grandmother) – “Mengan ne y apO?”
BUKU- “Masabo la retang asali mung bukO?”
SUSU (edible snails) – “Tikman mo retang susO?” `
~
Makanyan mu naman ing sukat tukyan nung ing ‘U’ ati yu king kadwang tauli nang letra ning metung a amanu [o ati yu king katlung tauli, nung pakibalak la ring amanung mapupus king ‘NG’ [bista man metung ya mu siuala iting amanuan a ‘ng’].
`
Alimbawa:
`
DURUN- “Marakal la retang arakap mung durOn?”
DULUK- “Buri mo reng ningnang-mayis a dulOk?
DULDUL- “E ka mipakirut ketang masikan a duldOl?’
BULUNG “Menakit na kang e malalanat a bulOng?
TUKUNG- “Agyu meng ibuat itang tukOng”?
PAYUNG- “Mebusbus ya kanu ing kekang payOng?”
~
Nung ing amanu naman, ati yu banda’ libutad na ning taladtad, o makapasipit ya [at ala yu king sepu], manatili ya ing ‘U’, o e ya iti miyalilan aggiang pang manenaya ya mung pakibat a ‘WA’ o “ALI’ [ing kutang].
`
Alimbawa:
`
APU-“Mengan ne y APU karetang darala nang mansanas Juan?”
BUKU- “Masabo la retang titinda nang BUKU nitang tau Guagua?”
SUSU- “Tikman mo retang inapag ku’ SUSU” nandin paugtuan?” `
DURUN- “Marakal la retang DURUN a arakap mo?”
TUKUNG- “Agyu meng ibuat itang TUKUNG a mitmu king balas?”
DULDUL- “E ka mipakirut ketang masikan a DULDUL nandin abak?”
~
Atin mu namang kutang a nung nu’ e la mibayu bebe ring amanung mapupupus king ‘U” (o ring amanung atin letrang ‘U’ king kadwa o katlung tauli) patse ing taladtad a kukutang, “open-ended” ya, o e ya kabud manenayang kapakibatan a ‘wa’ o ‘ali” [at aggia’man ati lu king sepu da ring taladtad ding amanung pisasabian].
`
Mapilan a alimbawa:
`
SULU- “Magkanu ‘ya ing asali mung sulU?’
PANTALUN- “Nanu ‘ya kulul ing kekang pantalUn?”
TABU- “Nukarin me linele itang tabU?”
ABUKADU- “Pilan la reng inagtal mung abukadU?”
TUKUD- “Makananu yang mepakli itang tukUd?”
SIPUN- “Kaninu ka miyawa ke’ sipUn?”
PASYUK- “Makananu ya katni ing kekang pasyUk?”
~
Karing taladtad a maglarauan (ca)casdan o pangabigla– menasa, ring ‘exclamatory sentences’ king Inglis, nanu pa’ta neng kayi, lilibayan la naman ‘O’ ring ‘U’ [kalupa na nung makananu ing daraptan karing pisasabian a amanu karetang mumunang adwang pamipalino keta’ babo na niting paskil.
`
Alimbawa:
`
MALAGU- “Kabanglu na nitang asaganan kung malagO!”
APU (grandchild)- “Lawen me, kabiasnan nang tumerak ning keyang apO!”
BURU – “Kanyaman da retang ebun burO! Bisa ku pa.”
TULUK- “Aggiang dirit e ra ka uman a kili-kili; e tulOk!”
ALUN- “Pangaragul itang alOn! Bala ku sa’ mityab ya ing bangka mi.”
~~
At dikil karing amanung mapupupus king ‘O” (o ring amanung atin ‘O’ king kadwa o katlung tauli,) aggiang nukarin la pa reti ibili karing taladtad, sanese o kawatasan, e la sukat alilan ‘U” ring ‘O’.
`
Alimbawa:
`
‘ALDO’ (e ya ‘ALDU’)
‘BABO” (e ya ‘BABU’)
‘PARO’ (e ya ‘PARU)’
‘SINGO’ (e ya ‘SINGU’)
‘MANONG’ [kituran a ‘manauang’] (ali ya ‘MANUNG’)
‘BALO-BALO’ (ali ya ‘BALU-BALU’)
… at aliwa pa.
`
At makanyan mu naman karing amanung atin ‘U”; e la dapat lilibayan ‘O’ naman deti, nung e makasaklo king pamipalino keta’ babo ing pangagamit da.
`
Alimbaua:
`
KULUNG (e ya ‘KULONG’)
SUPUT (e ya ‘SUPOT’)
KUKU (e ya ‘KUKO’)
… at aliwa pang kalupa da reti.

 


 


deng mangatsura

30/10/2018

timauang paniulat

Untitlssssssed

deng pengguin@siwalangsinukuan

 

deng mangatsura
manolo dela pena

Atin bayungtau. Mipanganak ya’ng disan ning kamalasan. Uli’ng anyang gagawan do reng sablang mangasanting at mangalagu, matudtud ya ing taung ini.

Ausan ta ya keng lagyung Apon.

Dakal ne piglolon i Apon e re abuburi reng piglolon na. Uli na ning likas nang itsura ‘ga na pin keng metua neng bayung tau e pa melwat dintang ing signus na.

Mitud pa keng daun medisgrasya at mete ya ing matuang bayngtau.

Tambing sinulapo ne ing kaladua na. Disan no ring marakal pang kaladuang makapila ketang arap ning pasbul a maragul. Balang lulub ketang pasbul pakisabyan na la nitang bante atyu karin.

Malwat yang menaya ing mete at miras na ing toka na. Tambing nang sinabi ning mete keng bante king pasbul, ‘Mayap kayaldon pu.’

Mekibat ya ing bante, ‘Anti mu naman keka kapatad.’

‘Nanu pung atyu keni?’ kitang na king bante pasbul.

‘Keni atiu ngan ing kailangan mu. Basta makatuki ka mu keng panuntunan mi.’

Tambing nang kitang nung malyari yang maglolo kareng babaying atyu karin.

Sabi ning bante kaya, ‘Malyari kang makapakyasawa keni, nu’ng buri mung malagu ya ing ayasawa mu, mimingat ka kalub mu. Uli’ng dakal pengguin kilub a dudurut. Uli’ng patye mekasagi kang pengguin makapakyasawa kang matsurang-matsura, a kayabe kabang-kaba!’ nga na ning bante kaya.

Anya kalub na kalakalale ya. Paka-alistu na pota makasagi yang pengguin. Tatakut yang makapakyasawang matsurang-matsura.

Uyta na pin, kalakalale ne, mekasagi ya pa!

Kabud atin yang asalubung.  Babaying matsurang matsura. Kayi kitnan ne, ‘Nananu ka keni?’ nga na.

Mekibat ya ing babayi, ‘Kalakalale na ku mekatud ku pa’ng pengguin!’

Yari ne pu.

 


 


irijia/arijia: tutu la o ali?*

25/09/2018

timauang paniulat

mask

guni-guni@siwalangsinukuan

 

irijia/arijia: tutu la o ali?*
lord francis musni

Irijia/arijia, mialiuang capaniualan, respetu, o tacut qng nanu mang bague, capaliarian a e pangcaraninuan, o mecad misteriosu. Qng pusu ning balang metung civilizadu man o ali, ating capaniualan caring bagueng masaquit aintindian. Ibat pa quetang minunang panaun, ing capaniulan at capanugalian da ring nunu tamu manalumpacan caring signus ning panaun. Ring signus a mialiuang tanda ilang babie babala nung nanung masanting at justu rang daptan; nung capilan la tanam, maglauta, mamupul, maglacbe, maquidigma, ultimo’ng pamanalacad bale o pamaglipat. Bista man dacal no careti ring mecalinguan qng quecaba ning panaun, ela ditac quecatamu ngeni ring maniuala careti. Qng modernung panaun at qng mabilis nang paniulung ning cienca, dacal la ring sasabing eno dapa panusigan dapott ngara uari ring mapila, “ala na mang mabatting quecata’mu nung paquiramdaman tala iusuc re’ng quecatamung macatau.”

Ring catipunan ding mesabing capaniualan tambing ta ‘nong cayaybe iba’t qng pangacaglicatamu indu tamu angga na qng magpante ta’ bitis. Ania pin sa iapag mi’la quecaiu reng mapilang capaniualan o arijia. [Ania pin sa iapag mi la quecaiu ren piling capaniualan a reti.] mapaliaring tutung macatula la ringn aliua careti at ring mapilan macapagmulala no man uling e ta la sucat isipan qng bayu tang panaun.

  1. Patie tatanam cang saguing, e ca tatalangan banua bane tumubu’ng milalu catas.
  2. Idurut la ring pinggan nung atin mamaco cabang atin pang mamangan, ban ligtas la qng puntalan da.
  3. Macaba la ie ring mangaragul balugbug.
  4. Eme lalacbangan ing anac uling ene dagul.
  5. Baual ing magcanta ya ing dalaga queng tulid calang, nung ali, macapaquiasawa yang mebalu.
  6. E ca manyimpan nung atin pang mamangan, nung ali ene macapaquiasawa.
  7. Ing matuling a mariposa linub qng bale, signus yang ating mate metung a camag-anac.
  8. Ing mamyalung api o baya neng bengi, magbatulalangan ya (mabulag ya neng bengi).
  9. Reng suput (o e tuli) magmuri la anac (marinat la.)
  10. E ca mattud alang laman atian o danupan mangalcal yang calderu ing caladdua mu.
  11. Nung bisa cang miguising maranun, paguising ca caring caladua.
  12. Atin datang a pera patie mecasalubung cang duling.
  13. Muran patia dinilu me ing pusa.
  14. E ca mamalis lugar neng mamangan nung ali mabalu o maviuda cang’gad.
  15. E ca magregalung paniu, cinturon, cuintas, sapatuus queng quecang novia/u. (nung sapatus la, maliaring pabayad mu la ambusque magcanu ban apangilagan ing pamicauani.)
  16. Nung meninap cang melagas a ipan o mebungal, atin mate caring malapit queca. (ban maiampat o ma-contra, paniabian o ipamalita mu)
  17. Nung dacal panas a matuling sesen mu la (suerti la ren.)
  18. Ganaca ya queca ing mengan o minum qng tagan mu. (o midenan uaua.)
  19. Ing asu queng quilub bale managcat yang duldul. (uling mapali la canu daya.)
  20. Ninu mang mialung pau mangalinguan ya.
  21. Istung igpan na ca ning tucu, e milaco pangapecat anggang e manuldul.
  22. E ca mamalis neng bengi ban e lual ing suerti.
  23. E ca mamusning paying queng quilub bale pota mabalag la ring laipan
  24. E mo luluclucan ding ulunan pota manigsan ca buldit.
  25. E ca lulucluc queng lamesang pipanganan pota manigsa ca buldit.
  26. E ca maniucle neng bengi pota mate lang’gad ding pengari mu.
  27. Ating mecaganaca queca istung misanipan ca.
  28. Icang pisasabian da patia aquet me ing dila mu.
  29. Nung buri meng biasa ing anac mu, mua meng paurud qng metung a biasa.
  30. Nung buri meng mapanyimba ing anac mu, ibaldug mo reng mumuna nang pipangucuan ning anac mu, queng dapucanan agua bendita.
  31. Queng paniatang ning primeru mung regla, magpasaldac ca quetang catlu nang baiting ning eran ban e maglambat ing quecang regla.
  32. Ing mecabalabal salamin, camtan na ing pitung banuang malas.
  33. Nung mangucu cang lunis ban matibe la ring ipan mu.
  34. E ca mandilu nreng vierniz, uling mete ing danum.
  35. E la titipa queng bale ring ulunan. (darala me ing buntuc mu; ing camatayan mu)
  36. E cac mamayad neng lunis ampo neng bengi.
  37. E mo duduang re’ng pamayad queng auang.
  38. E me tatactac o bubulus laman ing qquecang pataca.
  39. E mo lalague reng carayum catacup ning silim, magalauang la.
  40. Nung atin co’ng masaquit e ca pupunta queng mete (pota tuqui ya.)
  41. E ca mamasbul nung mabuctut ca. (magcasaquit cang manganac)
  42. E ca mattud queng pasbulan. (matet ca’ng ‘gad.)

 


* Iti nang cudta minuna iang melimbag at mebasa queatang bilungan (bulung, o uebsait) ning talalalang-talagulis-talasulat-macudtang Joel Mallari a maiaiauas Terabalak Discovery.


 


nandin

15/09/2018

timauang paniulat

diiip@siwalangsinukuan

diiip@siwalangsinukuan

 

nandin
christopher g. dela cruz

Sinampa ya ing anak a babai king pinara rang dyip at akit no reng adwang tia-dinalan a papil king istribu. Damputan no ning anak, at ali ya magsabi king katuki at makarungut a ima, mipmung liksi nong ikutang king babaing makalukluk malapit king istribu.

“Kekayu la pu, Dara?”

Kapkapan ne ning kitnan na ing wanan nang bulsa ning kayang pantalun, kaibat, kapkapan ne ing keng kayli. Makibat yang anting mipakirut.

“Ay! Kaku la pin! Binayad no kakung Mareng Luz. Menabu la siguru nanding sinake ku. Dakal a salamat, Neng!”

Kunan no reng pera at ibulsa na la. Makanganga la asbuk a mag-umasid deng mipapamulalang kalupang pasaerus.

Makatiman at makapa-andig ya’t makabural salung magmaragul, alalayan ne ning imang lukluk ing anak. Ali ya paulata– padaplisan neng malati at maimpis a kandut bandang tagiliran.

 


 


mamun ampong bakal ing pusu

15/09/2018

timauang paniulat

cabug ning pusu@siwalangsinukuan

pusu@siwalangsinukuan

 

mamun ampong bakal ing pusu
christopher g. dela cruz

“Balu mo, mipapaisip ku tagana nung bakit tamu megawa.”

“Gagu! Siyempre ban gamitan king pamanyugpu king kriminalidad!”

“Ampong maging kasangkapan mu rin king pamanggawang krimen?”

“Gagu! Lon me itang rinagsa yung Tsip inyang milabas a duminggu. Notorius yang oldaper ita. At agaganaka me itang metung a inaspak yu bungu, kaybat inugse ye ing labi na king sapa ning Tabon? Adik ya ita ampong reypist! Nung mabye la pa reta ngeni, banta la king seguridad da reng tau.”

“Makokonsensiya ku.”

“E ka makokonsensiya. Parti mu yan ning obrang binye na ning miglalang kekatamu.”

“Makokonsensiya ku tagana.”

“O, iyaku pin e ku isipan ing konsensiyang amanwan mung yan! Kayari ning sablang gagawan tamung ini, munlad ne ing bangsa. Marakal na kung taung pemate, a. Akakit mu wari king lupa ku ing pamagsisi? Para king balen ing sablang ini, Abe. Para king balen!”

“Tabalu ta keka. Miki panga-pusung bakal ka kasi . . .”

“Hahaha! At ika, miki panga-pusung mamun ka? Muting! Hahaha! O, sige na, magpagpag na kang pulbura mu. Ali . . . ali mu ne isipan pa ing bayung bait a anak a apate mu inyang pabarubal neng pengalbit Tsip ing gatilyu mu ketang operasyun tamu nandin . . .”