e at ali

10/06/2018

timauang paniulat

Untitled

mimisip; mababaligo@siwalangsinukuan

 

e at ali
mai stauros
para queca ia ini- icang e macaganaca canacu–

E mu cu paniuglung queng e dapat.
E na cu man mapagmaragul.
E cu naman rugu maselan.
E cu mu buri ing pacalele da canacu reng aliua.
Lilisangan cu patye atin cung casingquilan.
Malipup cu panamdaman!

E ca sa’ mimimua.
E cu mu taganang manaiun lalauan neng atin cung catayid.
E cu bage, at e cu bisa.
E bala na mu paquisipingan cu.
E ustu.

Ua! Queng ebun o ebus magsilbi cu,
aggiang cang Estung pa, o cang Ester.

E uari tutu ing amanuan cu?

Aganaca mu na co? At uwa pin pala, palaio que mu ing ‘e‘,
Balu ta naman iti e uari?

Quecang mangalimbatauan, paganaca cu,
acu y amanung “ali” a maralas ausan dang ‘e‘.
At queng pasibaiu pung sambitlan mu cu,
lacuas na neng susulat mu cu, e mu cu pu sa’
dadayit o tatayid kareng catuqui cung amanu.
Agiu cu pung talacad dili cu. Icatula cu ing lo’n mu cu
anti mong metung a cataya (word), ba’ng ne’ng misusulat cu,
saria mu cung icauani– pablasa’ng iti ing macatud.

E mu sa’ cacalinguan iting paquisabi cu.

Salamat pu,
Alia.k.a.E’

Patagal:
Deng maputi balu ra cu bilang y “No” o “Never” o “Not Any“.
Negative cu carela. Manaliua cu naman asque.
Magsilbi cung “determiner” o “exclamation”
o “adverb“o caya ‘noun‘ neng paquibat da cu.


 

Advertisements

pun ning baliti: kapusungan kuwentu

19/05/2018

timauang paniulat

monster

mipupulaian@siwalangsinukuan

 

pun ning baliti: kapusungan kuwentu
pusung capampangan

 


 

Uli’ng pane dang papatdan ing sulu ngeni , makatakut lulwal dalan pota apaindalan mu deng manabit o kularyut, magkwentu tamu….


 

Anyang minunang panaun atin lang pitatakutan
Atin pun na ning baliti
Atyu butarul baltangan
Makamaputi a susulud
Pisak ning benging malalam Masalusung lang pupulayi ding tsinelas dang tatalnan
Makapiyak a mata ra ninu man keni dumalan

Makatiwangwang a gabun malapad lapad a sular
Makamaputing babayi patye bengi keni lulwal
Dening manwala’t tatakut lalu nalang miparakal
Potang atin nang dumalan mangatug la tud gagalgal
Pangaras ning pangayabak ini yang dang pitataltal

Kulyat- Sampernandu ding thames gagamitan pamasada
Dening Driver at konduktor ilang pane misasangga
maranun keni dumalan la
Madalumdum a dalanan king oras ning alawuna
Mangalampag basyung biayi pang kape da man ala pa

Atin memarang babayi tiknangan de at seke
Maka maputi imalan makaba kaba ya takde
Ing matingkad nang susulud ing manguleng mala nebe
Mikatakut a kondoktor e akwang milawe lawe
Gagalgal ampong magnerbiyus mibalut kaya miyabe

Batyon-batyon neng malati king salamin ne lalawan
Siknangan kabud ing lub na at tsaka manene neng kitnan
Obat kitang ing susulud imbis ing kayang kuldasan
Simbitla kening babayi obat maputi kayu imalan?
Mimwang babayi, mekibat
keng Tide pinipi ke pa yan!!!

 

 


 

 


bacbac

13/03/2018

timauang paniulat

 

bacbac
pusung capampangan (micudta)
jose roman reyes laquian (talapanaius)

damulag sinukuanCagising-gising na pa mung Bacbac, agad na neng kinwa ing aldaba para ibuclat ne ing awang. E pa man mecapagmulmul, tinacbang neng macalawe keng maleparan dang tanam. Atyu ya keng balitang, macatalan king guyabnan ning eran.

Mag-a-alas kwatru y medya ning mipapalitan sala ampon dalumdum, macasilip ne ing aldo keng bale nang tutumbucan na ning pulmerung aslag ( ning aldo ).

Abatiauan ne ketang malawut itang metung caring calublub . Matuling yang anting gabun. Memaligwa yang tinipa . E no man linawe ding susulud nang tsinelas nung cambang la , mamaligwang linapit ya at ikit ne ing metung a calublub , mengadamusac ya at ala no ding macasibut a tenam da .

Matsura na tambing ing linub king isip na . “Sinalbayi do reng cacung tanam,” nga na palis tingtingking lub na, cabang mimisip yang panalucyan keng lawe ding bacas da ring bitis papunta caretang aliwang bale .

I Pepe , a inawus da naman “Bacbac”, metung ya caring pilacwanan na ning mabanding Don Manolo , uli’ng ya (i Pepe) ing matapat nang meging katiwala ning hacienderu. Mayigpit yang magbante i Pepe king gabun pigcatiwala da caya, ynya dacal lang mimimwa caya. Milyari nang misan, ding atlu caring cayabe nang talapagobra pisaup-saup de i Pepe, angga king picpuc deng batu king buntuc , ynya micapilat ya buntuc, at, ynya ding memaryu pemalayon deng “Bacbac”.

aring bulan@siwalangsinukuan

Miras na ing masala ( mag-a-alas otsu na ning abac ) . Miyalung camwa ampon taranta nung nanung pulmeru nang gauan a tacbang. Mimisip ya nung pabalu na agad ing milyari king makibandi o nung suplung ya keng ating upaya keng baryu da. Aisip na namung dumulung ya, puntalan ne cabalenan ing hacienderu. Teluntun ne ing dalan papunta ketang bale batu ning mabandi .

Pangaras na king arap na ning bale , tinuctuc ya king pasbul . Mebigla ya pangayakit keng memuclat king pasbul .

“Icayu pu pala,” nga na. “Mayap a abac pu.”

“Mayap a abac mu naman. Oba’t mipadulung ca?” cutang na ning don .

“Atin cu pu sanang anyaran municala kecayu , nung nanung gawan ku caretang menako caring tanam cu,” nga nang Pepe .

“Inta bakit, kilala mu la ding memangwa caring tenam mo?” cutang na ning makibandi.

“Opu,” pakibat nang Pepe .

tubu; lanubu@siwalangsinukuan

“Oini ing gawan mu,” nga na ning don, ” nung abitasa mu a ila pin ding kinangwa caring tanam mu, pakisabyan mong masalese, itang ala cang camwa. Sabyan mu carela a pasabi cung e da la sisiran deng kinwa dang tanam mu at itanam dong masalese pasibayu. At sabyan mu naman carela ing lakwanan keng casulatan itang macatiwangwang a gabun banda king paroba. Pasarul cu bucas a bucas. Pagcatiwala cu carela ing aliwa cu pang gabun a e mu na asasacupan.”

Bigla yang melulam ing lupa nang Pepe. E na ayaguantang mengutang king makibandi, “Oba’t gagawan yu pu ini? ”

mimisip, manguibalac©siwalangsinukuan

“Paruminggu cu neng durut-durutan ing balen tamu,” pakibat na ning don, “at ikit kung magkulangan ing pamangan . Ynya panabilin cung sipagan mu pang tanam. Gawan mu mu naman ing pamaki-kaluguran caretang mapangwa. Sabyan mung penabilin cung pacasipagan da. Keng daratang a bulan, yacu na ing marap at makisabi carela .”

Macaducu ya i Pepe, cabang apis-apisan ne ing bacbac na , angga na king sinabi na na mu, ” Mamun na ku pu.”

___________________________________

 


king sulip ning banwa*

30/09/2017

hondrade catacutan

 

sangang tanaman@siwalangsinukuan

malasing ku ngeni.

adalanan na ku, kabang makalukluk ku at magpaynawa king tumba-tumba, ning bayu pang mebalu king makatak nang asawang kasiping kung bale. inagkat na kung minum empi at penusignan ke. nukarin na misanga-sanga at pupulayi ing bidaan mi kabang tatage. tungkul king obra, tungkul king bie, tungkul king meaksidenti king traysikel at meangu bieng makatak nang asawa, tungkul king kayang pamangulila, tungkul king pamikaluguran, at tungkul king pung talisay a makayungyung king lalam ming pirurungutan. pilan besis neng memalag bunga ing pun talisay kabang miminum kami at maibug-ibug na keng mibukulan. itang katatawlian, mituranan ya buntuk at mituranan ku mu naman. asneng kaplas ing kayang sagakgak.

“oneng ali me paputut iyan,” nga na king libutad ning kayang sagakgak. “pantunan me

miminum©siwalangsinukuan

neng aldo mapali at kailangan mung salilungan. pantunan me neng aldo kauran at ala kang bulung a mengalaglag a kailangang palisan keng mula. kailangan ne ning katawan mu, pari. eersisyu ning katawan ampong lugal mung pipapaynawan.” saka ne inalduk ing laman ning kayang basu.

mekaatlu kaming boting empi bayu kami mituknang. sisilim na at etad ke king dalan.

tubu; lanubu@siwalangsinukuan“ali-ke-ta-ga-na-a-ka-ling-wan-pa-ri.”

nga nang susure palakad pauli karela.

malasing ku pin ngeni, oneng nung king tutuking aldo, balikan na ku pa ning mebalu king asawang kasiping kung bale, panusignan ke pa at minum kami pa at agnan kaming mangalingwan kabang lalasaan ming mibukulan lalam ning pung talisay.

 


* Ining timauang paniulat quinudta neng Hondrade Catacutan.

 


 

 

 


kapangyarian

08/06/2017

timauang paniulat

 

kapangyarian
hondrade catacutan

sapin@siwalangsinukuan

lagalag ya diwa ing aingkuwentrung tau kabang lalakad ka king dalan. asneng kamwa, makamalmal ya labi at pakikwanan na kang panasakitan. kininwa yang batu. mipmung panupaya, ali me binuldan. kininwa yang patpat, maratna me mung penlewan. ay, madyikeru ya kanu ing tau! kukumpas no reng adwa nang gamat, gawan na ka kanung ipas. o kaya dagis. o pusa. o kutu.

malumbe; magmalun@siwalangsinukuan

mipatiman ka. ay, ali na yata balu ning tau ing sasalikut mung galing. sige, pota, kauli, mumuna mung gawan, lukluk ka king arap ning makinilya. sumulat ka. ing taung aingkuwentru ing gawan mung tema. at bitbit ang daralang lunus, pakikwanan mung mibayu ing daranasan nang kabilyan.

samantala, lalakad, ginawuk ka pa mung pera king bulsa. mipmung panupaya, binye me king aingkuwentrung tau.

ikit me, nanu pa ta — ing kapupurmeruan nang timan ….

 


 


caluguran

08/06/2017

timauang paniulat

 

caluguran
hondrade catacutan

ligaia ning lugud©siwalangsinukuan

Caluguran neng Tatang ing gabun. Malugud ia mu namang maquipagcaluguran i Tatang. At nung ibili me quing cabiliang papamilinan me i Tatang libutad ning pamicaluguran (alimbaua mo quing damonius a Tancu) at ning gabun — alang salang iampang ne ing pacamalan nang gabun ban e dumanup ing pacamalan nang caluguran.

Nga nang maralas sabian Tatang: “Luguran mo reng quecang caluguran. Ila ring sumaup quing quecang casaquitan ban cang cumabie.” Ali tutu. Ali pilming tutu!

anac; caianacan©siwalangsinukuan

Babang lucsa nang Tatang nguening caaldoan a ini. Pabanua na pala ing milabas, quing libutad ning linang a peparam na ban e rumanup, canu, ing caiang damonius a caluguran, quinasat ia i Tatang at meangu bie. Pemaniucaran neng pataram quing catauan Tancu at caibat tinacas ia. At angga man ngening aldong ini, alang balita — quing acalitan nang pacamalan.

 


 

 


pat bonton

06/06/2017

timauang paniulat

 

pat bonton
hondrade catacutan

munag taimic@siwalangsinukuan

Mangulila cu cang Pat Bonton. Disipulus que. Asneng sutil oneng masicap magaral a anac. Magpabulan neng ali lulub quing escuela. Balita cu, meospital ia. Quing sabi, uli na ning saquit a ulser. Caia pala ing laue cu, mangaiaiat ing anac. At iniang mapilan a aldo baiu ia mesugud quing ospital, megui iang ali palabulad at pilmi neng apisan ing caiang atian.

Cuentu ning maindredus a ima na casiping dang bale ri Pat Bonton, na ing anac disipulus que mu naman, matipid la casi canu quing pamangan reng pamilya nang Pat. Sucat ing metung a catamtaman mung dagul a bangus, apaparas reng paruminggu quing cabilangang limang cataung pamilia. Macananu ing gagauan ra? Purmeru, iderang re pa

mimisip, manguibalac©siwalangsinukuan

canu ing bangus. Metung a tacal a nasi quing tatang, metung a tacal a nasi quing ima, metung a tacal a nasi quing coia, metung a tacal a nasi quing ati at metung a tacal a nasi quing anac a Pat. Ulam ing niningnang a bangus oneng ere galauan. Macatali at macasabit quing dulang. Pamauan re cabang susubu. Ita, ing bau ning ulam, ing carelang pinacaulam. Macanita mu naman ing gauan ra quing susunud a oras a pamamangan. Pipalipali ra ne mu. Angga na pin quing asasad re ing ulaman ra quilub ning paruminggu. At catataulian, ing capus palad a bangus, ilutu reng maquisabo, ibulug queng gule-gule alimbaua mo, at balamo piesta — canita la pa magpacabsi!

aring bulan@siwalangsinukuan

Isipan que ing anac a Pat Bonton. Casicap pa namang anac. Sagiua pa ing caiang catauan, saguia ing atian — caia siguru quing gagauan rang pamagtipid mipapamilia, ing caiang bituca ing minunang mituran.

Ai, capamo, piquiarian que pa ing lisiun cu. Adua na mung clasi. Caiari, bisa cung bumisita cang Pat quing ospital. Tuqui ca? Sigue! Tara!