ua, capampanganan mu cu!

01/06/2017

capampanganan mu cu

ua, capampanganan mu cu!

___________________

Advertisements

bisa kang maging poeta

02/11/2018

cauatasan capampangan

soto crisostomo

crissot@siwalangsinukuan

 

bisa kang maging poeta
manolo dela pena

Ika ing pakilupa ra ketang malagung dalaga
Potang ika nang dumalan mata makalawe keka
Karela ing matimtiman ing malagung mutyang reyna
At ding sabla mamaligwa makyabe la at sasangga
Potang ika ing libutad at mangamanu karela
Detang magulu tamiming masayang makiramdam la
Ding aduang e mikasundu gamat apitayid mula
Karela miras ing tula kapayapan mag ari ya

Ika mu naman ing metung matibe megawang balag
Patag a gabun ding asyas a malalam pangatasak
Atyu bungang makasabit bito bito e mabalag
Keka ing marimlang ambun uran keka manganagbag
Ing kislap ning aring aldo a makinang babye aslag
Ortelanu king taldawa karin gugusal nang sipag
Ilang kasaup dang pane keng pamangan ding miyanak
Pangagapi na ning tau ikang matibe kalasag

Sale kang pagdatunan da at pakiuangis da naman
Nung nu karin la magdatun detang ayup king kakewan
Ing kasaup dang tatakap kambe ring bulung tanaman
Ikang karelang bubungan payung lilung dang cambilan
Karing ayup susulapo mabuangis dakang pamanpan
Ikang gawan dang panyagka king anging ampon ning uran
Ing pepaisip ning ibpa ikang matas dang bantayan
anti yang bale ning tau makanyan nang kayarlayan.

Anti ka naman matapang metung kang pastul a maiap
Karing lasip makaumang atyu tungkud mung pamungad
Masayang atyu la gulut tutuki metung mung lakad
Ilang mapamintu keka ala karela titiplad
Karing lugal dang puntalan karin midala’t ipadpad
Masaya mulang babanten misaglulu’t mipanulak
Anti la mong miras karin paraiso dang peninap
Ing bie keti sikluban metung kang timun at patpat

Ikang delaraiang maiap ing mestru at talaturu
Mumubug ka kareng isip ikang mamantabeng guru
Ketang turung moralidad tuktuk ning matas a batu
Tas ning bunduk kasakitan pamanukyat king kalbaryu
Susing tagumpe karela a maiap mung pangamanu
Pati keng bungang biyabas kambe bulung papakit mu
Ing pituktukianang maiap ikang mestru dang modelu
Dakal karing kalupa mu ring kailangan naning yatu

Ing diariung kekang kauangis pakilupa da’t masampat
Kareng dakal mababasa keka dakal makasulat
Keng aldoldo atyu na ka kabuklat na pa ning munag
At dening misulat keka yang kapupulutang mayap
Maragul mung babye saup daup tang komunidad
Ining keka atyu miras matas responsibilidad
Ining kekang pamalita king balean yang makibat
Sinaklub iting dalumdum miras lulam keti labuad

Ika mu rin ing modista ika mu naman ing sastri
Ding makaalkus katauan asasaktu mu ing tayi
Keka talentung pemama tinggap regalu ding lipi
Magditimarung king piblas Ilang matula’t mawiwili
Ikang makayabe kwentu king napun tutung milyari
Pamagkulang ning istorya ika mu naman mitagpi
Gamat mu makasalale ding mengapirat mung dayi
ikang ausan ning balaean ban king sigat mangisulsi.

Ing panaun yang mabilis king pulayi ning orasan
Yang palad a manigapu ing manyawad a balean
Ika ing modista’t sastri atin kapaingtungulan
Ing diariu at talaturu keka wawangis mu naman
Maiap a pastul at sale iti keka da lerauan
Ikang malagung dalaga king kayang kapanaunan
Ika ing pantunang bante sundalus ning kauatasan

 

 


 


pamiganaka kareng mete

31/10/2018

cauatasan capampangan

Uccccntitled

cutcutan@siwalangsinukuan

 

pamiganaka kareng mete
elysian tulang liham

Ing pamiganaka kareng mengamate,
Kareng miyatulan king danup maglate
At deng mesambut na king bye pamipate,
Ing darakeng lugud iti kukulate.

Sopan la’t ganakan detang mengakutkut
Lalam kasakitan ning lua at lungkut,
Deng alang kakanan ampon sasayukut
King pun kakaluluan a megi nang bukut.

Pangadian la naman denan pakalunus
Deng keng kabisantu, inawa mibugnus,
King pali ning pantyun laman mangalapnus
King laru at api, magi’na lang menus.

Dapot kareng adwa, dagulan ing suyu
Karetang kaladwa atyu purgatoryu.

 


 


deng mangatsura

30/10/2018

timauang paniulat

Untitlssssssed

deng pengguin@siwalangsinukuan

 

deng mangatsura
manolo dela pena

Atin bayungtau. Mipanganak ya’ng disan ning kamalasan. Uli’ng anyang gagawan do reng sablang mangasanting at mangalagu, matudtud ya ing taung ini.

Ausan ta ya keng lagyung Apon.

Dakal ne piglolon i Apon e re abuburi reng piglolon na. Uli na ning likas nang itsura ‘ga na pin keng metua neng bayung tau e pa melwat dintang ing signus na.

Mitud pa keng daun medisgrasya at mete ya ing matuang bayngtau.

Tambing sinulapo ne ing kaladua na. Disan no ring marakal pang kaladuang makapila ketang arap ning pasbul a maragul. Balang lulub ketang pasbul pakisabyan na la nitang bante atyu karin.

Malwat yang menaya ing mete at miras na ing toka na. Tambing nang sinabi ning mete keng bante king pasbul, ‘Mayap kayaldon pu.’

Mekibat ya ing bante, ‘Anti mu naman keka kapatad.’

‘Nanu pung atyu keni?’ kitang na king bante pasbul.

‘Keni atiu ngan ing kailangan mu. Basta makatuki ka mu keng panuntunan mi.’

Tambing nang kitang nung malyari yang maglolo kareng babaying atyu karin.

Sabi ning bante kaya, ‘Malyari kang makapakyasawa keni, nu’ng buri mung malagu ya ing ayasawa mu, mimingat ka kalub mu. Uli’ng dakal pengguin kilub a dudurut. Uli’ng patye mekasagi kang pengguin makapakyasawa kang matsurang-matsura, a kayabe kabang-kaba!’ nga na ning bante kaya.

Anya kalub na kalakalale ya. Paka-alistu na pota makasagi yang pengguin. Tatakut yang makapakyasawang matsurang-matsura.

Uyta na pin, kalakalale ne, mekasagi ya pa!

Kabud atin yang asalubung.  Babaying matsurang matsura. Kayi kitnan ne, ‘Nananu ka keni?’ nga na.

Mekibat ya ing babayi, ‘Kalakalale na ku mekatud ku pa’ng pengguin!’

Yari ne pu.

 


 


dening menako biabas

30/10/2018

cauatasan capampangan

biabas@siwalangsinukuan

biabas@siwalangsinukuan

 

dening menako biabas
herman pablo

I pedru ampo i juan menako lang biabas
Babo na ning pantiun
simpa dening prutas
Apikasunduan da pitnang miyasamas
Alang mamartaklan ing alang manekas

Metung keka ngana ampong metung kaku
Kabang mamilang la ‘ting aduang menabu
Nganang pedru kaya pota ku’nala mu
Ing pamamilang da miras nang apulu

Kanyan mipadalan pablung mayin mayin
Dimdam na ing swala milako ya lasing
At yang mikatakut milayi ya tambing
Sinabi na king pari at tiki ne karin

Among dimdam ku pu pipitna ding mete
Bosis ning satanas , angel a manene
Tuki ko pu kaku bang kung apatune
Karas sementeryu mekramdam king lele

Adua nalang pulu ding kaku at keka
Detang adua lalam ning kuma kekata?
Dimdam na ning pari ing simbitla ra
Bilisan mu pablu ing mulayi tana

 


 


y pedrung tatagal capitan

30/10/2018

cauatasan capampangan

mangamanu, maquisabi©siwalangsinukuan

mangamanu, maquisabi©siwalangsinukuan

 

y pedrung tatagal capitan
irvin harvey rivera (siuala ning maliwalu / anac ning baculud)

Atin cung balitang acalap qng bariu
Tatagal ia canung Capitan y Pedru
Agpang qng balita a miras canacu
Llamadu iang palac a manicuang botu.

Nung qng sipagan mu e ne man malacuan
Dacal ne agaua qng bariu nang tibuan
Metung na careti, caring caianacan
Apanaligan de qng bague macanian.

Number one ia aniang tinagal iang Concial
Inia, manuala iang managumpe’t mialal
Subucan na canung Capitan ia tagal
Paniulung ning Bariu e ne matigagal.

Nung lumput ia canu at y iang mipala
A maguing Capitan ning Bariu Pagaga
Calupa ning caiang masampat a nasa
Buri nong sopan ding cabariung maluca.

Muna nang proyectu, pagaua iang dalan
Bang itang paniulung ning Bariu amatan
Binang masaleseng buri na pang daptan
Pasamentu no ngan canu ring daiatan.

Cadua nang proyectu, bina iang matilo
Agiang qng isip mu alang bisang ticdo
E ne man mo canu a binang masaclo
Ing buri na sana ing tacpan ne’ing aldo.

Catlu nang proyectu, pagaua iang bale
Atin iang ospital at pialbeng sine
Nung buri iu canu ing masampat a bie
Qng mental ospital, Capitan botu ie.

 


 


melakwan

30/10/2018

cauatasan capampangan

gagaga; quiquiac@siwalangsinukuan

gagaga; quiquiac@siwalangsinukuan

 

melakwan
artdax

Ining kawatasan tutu yang istorya
Oini ing milyari kang bapa ku’t dara
Kamate nang ingkung atin lang amana
Atipun nang ingkung a dakal a pera.

Ing bilin nang ingkung nyang bayu ya mete
king ding atipun na panyali dong bale
pablasang ing bale apagmaragul de
e basta mabating, pibandyan yang tune.

Y Bapa ku’t dara kin’wa lang ajenti
ban maglawe bale keni king New Jersey
Pablasang dakal lang apamilian keni
Masakit tumawad kareng maki bandi.

Ing ikwa rang agent Pangan ya aplidu
Paglawe nong bale Biernis o Sabadu
At ding papakit na masanting la presyu
Dapot ding pera da kulang la pa kanu.

Inya mepilit lang lumawe tuknangan
Ketang matwang lugal malapit libingan
Ing bale lon tamu nga na pang Miss Pangan
Bale ya mang matwa mas matibe neman

Miras la king bale, bale yaping matwa
E ne man marinat, kilub modernu ya
Dapot makaba na ing dikut ning mula
nya keng pamalak da atawaran de pa.

“Libutan ye’ng bale,” nga na nang Miss Pangan
“Lumwal ku mu sag’li atin ku mung awsan..”
Y dara’t bapa ku manik no king eran
ketang pekamatas atin lang amasdan…

Anak yang malagu ing apagmasdan da
Maputi ya baru lupa yang siam banwa
Bakanti ya’ng bale king panintindi ra
detang makibandi minta no Europa.

Ing anak ikit da king babo ning eran
Makatas ya buntuk mataktak magmanman
Mengatakutan lang era balung sabian
Agyang e manakut, ala yang gagawan

Y dara keng sindak mipagulisak ya
Saka ra apansin medalumdum pala
Ing anak buri deng pakisabian sana
Bigla yang ginulut, king silid ya minta.

Kanyan ne man lungub bale y Miss Pangan
at apansinan na lupa lang mipasdan
“bakit nanu ita?” nga na nang mengutang
mekibat ya’y bapa, “Ating makatuknang…

…Kening bale iti! Bala ku mo sana
King ding maki bandi atiu la Europa”
“alang tau keni, bale bakanti ya”
Yan ing pipilit nang Miss Pangan karela.

“O ninu na itang anak a ikit mi….
Keng babo ning eran magmasid kekami
Pormal ya itsura e ya bisang maili
E ya man manakut mitakutan kami…”

“Ginu ko tara na!” gingkas nang Miss Pangan,
“Angga ngeni pala lalage ya pa yan…”
Atin kasing kwentu a misan kung dimdam
A ating kaladwa a keni melakwan….

Kanitang milabas limang pulung banwa
Atin kanung anak a keni pete ra
kaibat deng silbahi ing kayanakan na
lislas de pa atyan ding alang konsensya.

Nung ninung kriminal alang maki balu
Mete ya’y tatang na pilan Dominggu mu
At itang koya nang labing lima pa mu
Kaibat na ning libing yanamang mepatu…

Ing inda na naman ning anak dang ikit
Melingo ya buntuk layun yang memurit
King pamaglayas na ali ne meyakit
Mete ya siguru keng lumbe at sakit…”

King kotsi kanyan no mintang pupulayi
Ban mirayu la king anak a mesawi
y Miss Pangan naman asang na melangi
kabang magmanehu gagalgal ya labi

Dakal no ring banwang kinusad malale
Y bapa ku ngeni mika pamilya ne
Dapot y dara ku ala yang kayabe
Ene mekyasawa yang dili king bie.

Ini istorya nang Dara ku kanaku
Madalas neng bengi ketang pasamanu
Anak yang malagu ing sisilip kanu
pamalak na ya pin ing anak a multu.

Madalas neng bengi kakera nang dara
kabud na mu ating migut keng bitis na
Balu nang ing anak ing tatagkil kaya
Ing e na mu balu nung nanung buri na…

 


 


dening ortelanu….

29/10/2018

cauatasan capampangan

pamiabe-abe©siwalangsinukuan

ortalanus©siwalangsinukuan

 

dening ortelanu….
— patria bondoc david augusto m. reyes
— john bendido / edna angeles

pamitalamitan deng watas

augusto m. reyes:
Karening uyat ku mamagus ing daya
Na ning ortelanung tantu king kaluka
Dapot maluka man ing karinang bina
Lipakan kung palad ding babiye biyaya.

patria bondoc david:
Anti ku nang ikit ing sipag mu’t tyaga,
ketang panaun mu, pibatan mu yata,
kareng amanu mu,  ‘me kung ayulata,
balu mu ngan pala, ing bie keng taldawa!

augusto m. reyes:
King bie ku kanita misapwak ya’ing amun
E ku kabangkabang magobra king gabun
Dapot ining pusu aggiang pang linimbun
Mibalik ya mu rin datang ing panaun
Nung nu ya paynawa pangagatpanapun.

patria bondoc david:
Uling masanting ya , iyang kekang layun,
e ya kabang kaba , tatalan kang gabun,
ikwa mung meyari , king sakit ning amun,
kapamilata’na ning giya mu’t padrun.

edna angeles:
Nyaman yung pakiramdaman,
mala balagtasan kekong sasambitlan.

augusto m. reyes:
Mianad ku pin ma’p king obrang asikan,
Apulut ku keni ing kapibabatan,
Anya keng lebasan papunta king ayan,
Ala la reng suksuk aggiang matibu man.

augusto m. reyes:
Meyari ku man pin at mika diploma,
At e man melambat mika lisensya pa.
E ku man meinip king pamanintun obra,
Uling ining obra yang kaku menaya.

patria bondoc david:
E man pin sumbagal , yang kekang lebasan,
king pamag tamasa , king kekang larangan,
ngeni adwang gamat mu yang tatamasan,
kambe ning pamilya at kang apung TIMANG .

john bendido:
Tune manaluntun kening kakung diwa,
Keng milabasan ku kakung kayagpangan,
Matalas yang lingko pane kung tatalnan,
Makibatbatan ku mayap keng patasan

patria bondoc david:
Maski nu na ka padpad ning kapalaran,
e muna adayu ing e mu gunaman,
ing kekang ibatan ortelanu misan,
manatili pa mu rin, angga kapilanman.