ua, capampanganan mu cu!

01/06/2017

tanaydara!

ua, capampanganan mu cu!

___________________

Advertisements

pesus

16/07/2018

cauatasan capampangan

pera; pesus@siwalangsinukuan

pera; pesus@siwalangsinukuan

 

pesus
eduardo bagtas garcia

Ing ulaga na’ning pesus e abalu?
Cabang dacal cualta king tula milalu.
Pauli na niti mibulag ca’ng tutu.
Culang ia’ng pesus e mibu’ung apulu.

Caring magpalimus pesus ia ing ibye?
Nung alang pesus que’sa mu king e Mamie?
ING pesus carela maragul neng bage.
Balu de ulaga panyali’ng tinape.

Atin Naman tawu awsan da mu’ng susyal?
Sal’wan ing buri na gang tiktakan pa mal.
O’t mu talipapa libu e mibalbal?
Panen tawad king pesus a mu bat camal.

Anac canita king pesus a nu tula.
Nung ni’nu minye acwa pang pamalita?
ING pesus ngeni pamparatang ne’mung lua?
Nung e miragdag.tumercu at gumaga.

Icua cu’ng mitamle.balita ing pesus?
Saingsing da’ng curudu.migtas na’ng purus.
Sablang memalen ing caplas kenu bugnus.
Cambe ring segana.pataca’ng mibusbus.

Que ‘cayu idake cutang king sarili?
O’t mo I Rizal pesus re mu binili?
Nanu pa’t miyawus pangbangsang bayani?
ING lugud king balen pesus ia ing sukli?

Daca’la pesus daca’la caluguran?
Daca’la panyali daca’la puntalan?
Nung alang pesus pilan mu deng mitagan?
De’ta na’ng awsan da’ng tutung caluguran.

 


 


iyang akalinguan

16/07/2018

cauatasan capampangan

carin queng ilug@siwalangs

pupulaii@siwalangs

 

iyang akalinguan
sergio ‘sergs’ g. calayag

Kunsuelo ing panandaman potang ating pupulayan
Nung datang man ing pagsubuk kening bie ta e alisyan
Tiktak ya man king kabayat, ini tutung maging mayan
Itang lndu ning pamilya, iyang tutung lalapitan

Itang kanta da reng Beatles, “Let it be” ing titulu na
Ing lagyu ning Birhen Maria, iyang tutung simbitla da
Kasopan na iyang ibie, nanu ya man ing problema
Ilapit naka tamu ketang Anak nang tutung sinta

Alimbawa la reng ayup, susulapo karin banua
Pangauli ‘tin pamangan babie karening sibung na
Dagis man, aso’t pusa, ing pakamal papakit da
Animal mang masasabi, malugud la keng pamilya

Potang lndu yang kailangan, misang awus iyang datang
Tutung eka paimburisan, uli’ng ikang kaluguran
Daya naka ampon laman, katawan na menibatan
Parte naka nitang bie na, ikang sintang pakamalan

Panaun mang kagutgutan, ing pamilya yang manalig
Kalingapan at masabal kayabe ya’ng malasakit
Paimburisan, ali naka, kabilian mung magigipit
Ipagpa na ing kasopan, iyang kekang tutung akit

Balikan ta ing milabas keng problemang adalanan
Makatuklip la rening tud, ing Rosaryo yang tatalnan
Memakbung ma’ng Pinatubo o king EDSA ing labanan
Rosaryo ya ing kalasag, ing saup na iyang aduan

Balamu yang akalinguan, kapatad a Catolico
Kagutgutang malilyari keni sintang bansa tamu
Makisabe la keng agus, e pangadian ing Rosaryo
Ing katasan yang mimiral, kayabangnan ing magbabo

Agkat dako sana ngeni, ing rosaryo yang pangadian
Maus ta king lndung Birhen iya sanang mamilatan
E yu papainan ing lub yu, manalig ta keng kasopan
Malugud tang Birhen Maria, tutung iyang makirandam

 


 


king kweba ring mangmang

14/07/2018

cauatasan capampangan

salangan ning abac at ning bengui©siwalangsinukuan

queang olimpus©siwalangsinukuan

 

king kweba ring mangmang
renato b. alzadon (tauling poeta)

*
King pangasukul mi king kweba nang Plato
Ala keng akakit nung e mu anino–
Anino lang bage lalakad, gagalo;
Anino lang yatad ning sala ning aldo.

*
Dening kayabe ku king lub na ning kweba
atmu no kagaling mikatsang istoria;
inya ding anino a peka paksa ra
gagkas dong balamu tau nang talaga.

*
Kekaming magdatun king keralumduman
Dimut kami salang atitimanmanan;
Inya, nung nanu ing kekeng darandaman
Bala mi yang tutu, agyang e katutuan.

*
At misan a aldo, ing metung ming abe
Ikwa neng akalag gapus na king takde;
Linual ya king kweba. Oita pin, ikit ne
Ing tune sikluban king tutu nang aske.

*
Ikit ne ing yatu. Ikit ne ing aldo
Ikit na ing salang manatad anino;
Ikit no ring maldang lalakad, gagalo
At karing mata na ing sabla melino.

*
Mibalik ya kanyan ba’yang mamalita
Kekaming abe nang king kweba mesila;
Dapot; ulinaning mangmang keng mistula
King gagkas nang tutu, e ke meniwala.

*
Nanu mang abluk nang kaya kami tuki,
Ali kami bisa, tikis keng pa-ali;
Ing bie king masala ali mi ya buri
Uling king dalumdum, ken na ke migawi.

*
Makanyan ke bili, ikeng taung butang
Mibabata kami king bie mipalamang;
Inya ding anino mako no at datang
Makagapus ke pa king kweba ring mangmang.

 


 


e cu sa’ curusan a dila

14/07/2018

timauang paniulat

tacpan la reng balungus@siwalangsinukuan

e bumulad@siwalangsinukuan

 

e cu sa’ curusan a dila
mai stauros

E cu sa’ curusan a dila.

Nung mipaltutu at miras ya man ing catatacutan nang aldo ning ca’cung Indung Balean– itang potang ume neng mapatad a inaua ing keyang pacamalan a Amanu; nanu pa ta’ malaus neng matda ing keyang ningning at sampat, manangis cu.

Dapot busal ning capalsimian cu ketang penandit a ita, abitasa cu ing e ke sucat parsalanan ing canacung sarili king pangayangu na bie ning amanu cu. Mecad kelambatan caibat na nita, panicuanan cung ayamyam ing catutuan; anggang binit sicnangan cu ing lub cu ban mayan at malualas cung arapan itang tagcu.

Ali na sa’!

Iti ya ing ca’cung acclis. King sicluban ya ing ca’cung panigapu.

Macanian man, e cu sumyo alang patna, o managulele cabang-caba, pablasang balu cu king pangatau cu ing e cu meging dake caring sangcan; at capilan man ali cu— menasa, king sariang maplas a pamamupus ding aliua king keyang bie; uling misan man e cu rugu mekisapacat caring mamulang a tampalasan a keya mecamate! Ala cung pakibatan datang ya man itang malulam a cagatpanapunan a ita,

Maniadsad cu.

‘Anta ica?

 


 


laladu ya

14/07/2018

cauatasan capampangan

susulapo@siwalangsinukuan

susulapo@siwalangsinukuan

 

laladu ya
eric dizon

Atin metung a burarul, e ya ustu parasucad
E masalese sulapo, cabud ya rugu titiplad
‘Nya maralas malilyari, busna nu’ ya man mipadpad 
E na pa man icuang mitas, mananacbag ne pin agad

Patye ya nang lipolipo, ining mesabing burarul
Neng catsurang susulapo, asne pang capagmaragul
Ala man caya maniglo, uling neng carucat culul
Aggiang ken mung carang-carang, acacua nang masasaul

Ing sinulad nang mataram, a misamutan paragas
Iti ya ing meging sangcan, ning cayang pamagparagas
Pablasa pin laladu ya, e na acacuang mitatas
Careng buri na pang dasan, e miyabut e miraras

Nung micaaske yang tau, ing e ustu parasucad
Mecad laladu ya naman, ‘nya mananacbag yang agad
Ketang buri na pang dasan, e na man agyung misadsad
Uling e bisang payulip, ketang mali nang timalad

 


 


ing lutu nang indung nuan

14/07/2018

cauatasan capampangan

mamangan©siwalangsinukuan

mamangan©siwalangsinukuan

 

ing lutu nang indung nuan
jannette beltran serrano

Kalwat nang e atatacman
ing luto ning Indung nuan
simpli mu iting pamangan
na naman tictac niaman

calupa ning sigang tuyo
a keya mung inimbento
gandus a keyang linaso
ban dayuput mu ing sabo

Ikeng anac na caburi
nake saya’t cucuratsi
mananapnap ngan ing nasi
lacwas nung sabo mapali

Ne caracal balung lutu
miyaliwang clasing relyenu
pero ing peka-paboritu
alimasag a relyenu

Bagcus atno cacualta
canitang panaun ayta
pitu-pito reng ipus da
e akwento ot mebyasa

Luto nang asadung karne
sisinup iskaparate
kukuwang kala-kalale
patse e ya makalawe

Kalameng biko na nyaman
lalam katri gugulungan
iyang e cu acalinguan
angga ngeni pagdulapan

Tictac yumu nang aleya
potang atacman mu ia
sugradung e ca sumawa
uling qng keyang lasa

Luto na kumpletu sangkap
n’ya qng cabsi e misingap
ne kay’lig mangabit kesyap
pamangan sag’li sakildap

Pamaksawa migcasakit
pamagluto e ayaplit
para cacu atna sulit
qng kalan e apalapit

Uli ning e ayamuyut
quecong babayi ipayabut
keng maglutu tatanud
mister e milaco lugud

Atin tamung kasebian
atin sag’li mung paralan
keng pusu reng kalalakyan
ing kanung keyang atian

 

 


 


katawan ta ingatan

14/07/2018

cauatasan capampangan

catauan@siwalangsinukuan

catauan; pamicacatauan@siwalangsinukuan

 

katawan ta ingatan
jannette beltran serrano

1
Mengari yang gabun/ katawan ning tau
tumubu ia keni/ing bisang tumubu
basta na mangamal/ ing anggang panulu
e ka miket-iket/king kamal ning presyu

2
G’yang ‘lang panandaman/ dapat palawe ca
ban makasiguru/ ala cang diprens’ya
ala nang mumuna/ing malalawe ca
nung atin man sakit/ ayagapan mepa

3
E itang malala/ saka ca sasamal
atna pa naman mal/ ing papaospital
nung pidalan keka/ pribadung ospital
matda ka keng gastus/ e ka makayangal

4
Ing catuliran da/ot dela me carin
balu mung e miket/sinigi pamu rin
ing buri nang sabyan/ing atinan kayu
e sa dela carin/nun e agyu-agyu

5
Dapat mapamangan/
yang gule ing tau
ban bie na lumwat/ iang siguradu
e kakaligtan ing/ pamag-ehersisyu
mangan masustansya/ keng sakit dumayu

6
Deng kekatang anak/ e ta la papab’ren
sitsirya pangilag/pane lang babanten
ing pamamangan da/ pane tang lalawen
nung malyari sana/ deti pekasesen

7
Sitsirya keng anak/ e dapat pagpane
papagbakalan meng/ biskwit o tinape
e dirinan pera/ ban yang e misane
ban e makasali/ inuman de-bote

8
Ing wastong nustrisyun/ lubus yang kaylangan
biye na niti keng/ kekatang katawan
nune iti alang/ anggang casicanan
kekatamung anak/ sicanan ingatan

9
E dapat mu prutas/ nune pati gule
ing kekatang kanan/ bayang tumibe
ing katawan tamu/ dapat masese
e maglupang mayna/ampon pase-pase

10
Panaun ta ngeni/ maldo at muran ya
ban katawan tamu/ e ya iti mimina
katawan ta dapat/ maresistensya ya
nan’ mang klasing sakit/ apangilangan ya

11
Pane masustansyang /pamangan ing kanan
ban iang sumigla/ kekatang katawan
kalusugan tamu/ sesen ya’t ingatan
Uling pigkalub ne/ ning Ginung Miglalang

13
Nung ‘ting binye bie/peg-alang bala ya
mangari yang bandi/gulpi n’yang mewala
kekatang paninap/matdas anting bula
anya bie tamu/peka-ingatan ya

14
Nung man ing tau keng/ kayang sicanan
ing kekatang sakit/ sag’ling solusyunan
masustansya mu sa/ ing pane kakanan
sag’li kumaiap/ e pigaganacan

15
G’yang macanian man/qng dios iyaus
nanuman disgrasya/itangan micabyus
iyadwan ta naman/cumaba ta bie
ban pacamalan qng bie/malwat acayabe