ua, capampanganan mu cu!

01/06/2017

capampanganan mu cu

ua, capampanganan mu cu!

___________________

Advertisements

papasacsac ne!

21/01/2019

capusungan at panguiliquitic

papasacsac ne!

saksak fan


pokwang

20/01/2019

capusungan at panguiliquitic

pokwang

pokwang


bie pilipinu

19/01/2019

capusungan at panguiliquitic

bie pilipinu

c16fe302111d066153bb52accad3c551 buhay pilipino


bie pilipinu

19/01/2019

capusungan at panguiliquitic

bie pilipinu

mars ravelo


ping at pong

19/01/2019

capusungan at panguiliquitic

ping at pong

ping at pong1- by sarile-darna komiks72


tartan

18/01/2019

capusungan at panguiliquitic

tartan- komiks cartoon-79-2 (1)


saquit a macatula

18/01/2019

cauatasan capampangan

macatiman©siwalangsinukuan

macatiman©siwalangsinukuan

 

saquit a macatula
suez mac

i
Ding saquit canita, deti balu mo pa?
Panuligsan ta la, tungal-tungalan pa,
Ilarauan cu la, pati panulu da,
Mecad disan mo pa, at mipacayli ca,
Itang masanting na, acabyusan ta la.

ii
Saquit amanuan cu, ca rin lang calulu,
Macapal lang tutu, at e cu rin balu,
Ot itamu rugu, buri da ca tamu?
Baquet uari nanu, mapanusig tamo?
O caya naman mo, maganacang tuto?

iii
Taladtaran cu la, pibulayan mu la,
Ing gac-gac mu sana, ditac a aguanta,
Pac’randaman mu la, ngeni miyadya ca,
E guiguiguit sana, at manulu uaua,
Pota mabangle ca, quing sobra mu tula.

iv
Umpisan cu la pa, detang sicat bagya,
Anti mong LIPUNGA, tutung macasora,
Nuco magatal la, taliri mu tunga,
Qng dase ‘gadgad la, liguis-liguisan pa,
Patac ning candila, itang panulu da.

v
Atin pang mabaya, ing aus da TIGSA,
Iti daragul ya, titipun yang nana,
Quirut-quirut ya pa, susyo at quicquiac ca,
Nuco casaquit na, e me pin abata.
Lalu’t dinugpa ya, quing lele mung puerta.

vi
Deta rugung matua, ume lang manaya,
Potang malulut ya, boting panatdas da,
Pengaring aliua, coyu ing tapal da,
Lulut ya canita, lual ya itang mata,
Mipusit ing nana, at mipasno na ca.

vii
Ding anac aliua, pane lang MANACLA,
Macananu caya, tutu lang masiba,
Potang deng talangac, lungcas la pin bigla
Deti buru da la, aslam tiltil do pa,
Atian sayucut la, buldit aslat da na.

viii
Gaun na canita, ding quecatang matua,
Bulung benabana, iti ilaga na,
Queca pin paynum na, mapayit a alasa.
Tacla’t sumuca ca, mangaslac ca mata,
Eltor ing aus da, o METALANGCA ca.

ix
Idala cu ne man, qng BUNING magatal,
Malutu-lutu ya, at pultic-pultican,
Agad meng agapan, mabilis yang dacal,
Lalaqui pin bican, malaguang silaban,
Queca yang culuban, Qng calderung bacal.

x
Asuc a mipecat, cuanan mung banayad,
Quing maputing bulac, at quecang iyadiad,
Qng buning pacalbag, quing lele mung tumpiac,
Tutung misnang caplas, acua mung gulisac,
Mate ya’t masilab, buni mung maglundag,
.
xi
Ngeni ing tutuqui, lagiu na BAYIQUI,
Pacalbag ya iti, laue mu tabingi,
Acua mung mañibi, quing saquit na niti,
Anti ya mong tiuni, asne pang capali,
Masaquit mañabi, masâquit ca pisni.

xii
Malagua yang uluan, sali ca mung aslam,
Ume meng samutan, bale ding tatabuan,
At saca me denan, tinang asul naman,
Tapal mu iti nan, Bayiqui quing sicang,
Quirut a panandam, iti milaco ngan.

xiii
Ing BABAYA MATA, a macapanaua,
Malutu’t mapalas la, ding queca tang mata,
Itang camulat da, deti mipecat la,
Potang buclac mula, muri bacbacan pa,
Irap tutuqui la, mangapangisngis ca.

xiv
Bâ la mong cumayap, matang mipupucat,
Patacan dong gatas, Indang ‘bat menganac,
Nung alang menganac, Imi ing caliuas,
Nuco asnang caplas, sobra caligasgas,
Uli na ning calat, Acua mung mipaquiac.

xv
Atin pa mo galang, deng sobra cagatal
BUNGANG ALADONG ausan, qng gulut catauan,
Atin anggang batal, balat asnang gaspang,
Tutu lang macapal, gamus alang tucnang,
E ca man milulual, macarine la man.

xvi
Neng lilintic canu, salud meng gulut mu,
Sabi ng apu cu, langi la pin canu,
O nung burianan mu, manintun cang gogo,
Iyang quecang ‘polbu, caring mangatal mu,
Oyta ing panulo, ca ring bungang aldo.

xvii
Bayu co calinguan, deta pang ALANAN,
Balamu mu bâlat lang, maputing daracal,
Ulap ing asque dang, a baladbalaran,
Aquit mo quing batal, manga quing lupa man,
Balamu asu cang, ausan dang Dalmacian.

xviii
Ing gagamitan da, para maulu,
“Apop solution” ya, ita asali ya,
Nung ala cang cualta, manupaya ca pa,
Bacbacan mu ne pa, bauang a saguiua,
Caybat igagadgad ya, alanan quing lupa.

xix
Ume cong ibuclat, ding ausan dang AGIAP,
Anti la mong sugat, magatal lang tictac,
Asbuc la magbabad, carin lipat-lipat,
Pambuc a pacalbag, balamu masaspac,
E ca sasagacgac, labi mu mapirat.

xx
Ding minunang matua, potang uluan dala,
Ca bang pin mibubua, abias a tinun da,
Ing “buang nasi” ngara, iyang gamitan da,
Tiltil de canita, itang taliri da,
At caybat na nita, quing agiuap pecat da.

xxi
Ampo pa mo galang, ing e cu calinguan,
Busbus ning pitaclan, MANAGUILID ne man,
Nung mong ilarauan, saquit a delanan,
Maplas ca panandam, ngisngis alang tucnang,
Nung ume meng uasan, o caya pulisan.

xxii
Itang saquit canu, iti acacua mu,
Pamanangus atbu, at sobra mayumu,
Bang e damdaman mu, gauan ng apu mu,
Uluan ne pin canu, quetang larung buac yu,
Patacan ne rugu, busbus ning buldit mu.

xxiii
Atin la pang ‘sabyan , BUNTUC A SUGATAN,
Aus da BACOCANG, ing buac pepecat ngan,
Ume do pang calbuan, buntuc a DICDICAN,
Ânac mangalangang, acamarinayan,
E la pin milual-lual, buac da meuala ngan,

xxiv
Ding DICDIC ausan da, nung queca la digpa,
Aguiang babayi ca, pilming mabucu ca,
“KUNG FU” ing aus da, ustung ticsu da ca,
Ing “agocsunada” iyang paglinis da,
Langib bacbacan na, manga quing langi la.

xxv
Nuco casaman cu, ding ausan dang CUTU,
CUMAD a mapinu, gagapang buntuc mu,
Lias a ebun cutu, macquinis qng buac mu,
Ila mo pin atlu, cuculam lang tutu,
Detang quecang cucu, ilang pangamus mu.

xxvi
Ding babaying dacal, queta la quing eran,
At tuqui-tuqui lang, micuculapan ngan,
Deta pang mapilan, asue ing gamitan,
Agad de pang lantang, calendariu naman,
Gauan deng dicdican, caring cutung dacal.

xxvii
Atin pang tutubu, anti la mong calyu,
Qng taliri tamu, aus da GALIGU,
Eno man istorbu, tutung manong la mu,
Acaqua mong tutu, quing sobra licut mu,
Quing cacadacma mu, caring tugac batu.

xxviii
Buri mong milaco, detang galigu mu,
Neng mangildap canu, carayum ng ‘Ma mu,
Pali me pin ustu, quetang paritan yu,
Quildap agnanan mu, cambe carayum yu,
Tultul me pin ustu, quing quecang galigu.

xxix
Deng pang macasora, ding LASU quing dila,
Singo la mung bigla, a e mo piyadia,
Ing sicung sagiua, gauan me pin adua,
Itang queang agta, gasgas mu quing dila,
Cumayap yang bigla, asna quing caligua.

xxx
Deng aliua naman, tutu lang SIPUNAN,
E da buring ilual, mabierdi-bierdi man,
Nung tutulu mu man, agad dang singutan,
Anti ya mong anac, lual lungub pisamban,
Itang queang sipun, layun pacamalan.

xxxi
Ita pang mabuluc, ing aus da TULUC,
Saquit qng balugbug macaqua quing licut,
Aqua dong atusuc, carelang balugbug,
O sipun mebuluc, balugbug tinaglus,
“Infection” mebaldug, tinulu ca tuluc.

xxxii
Ing Inda canita, uluan ne’-ing anac na,
Agad ne mong adia, ing agocsunada,
Ala nang aliua, nung e mu pin ita,
Quing quelambatan na, iti cumayap ya,
E na mibalic pa, saquit a dinugpa.

xxxiii
Deng e cu calinguan, BULUTUNG mu naman,
E mo acabyusan, queca pin mo datang,
Iti nung capilan, e mu balu mu man,
Balat mung maselan, iti mitubuanan,
Laganasan na ngan, alang e miritcan.

xxxiv
Ita nang balat mu, at lupang mapinu,
Mengari ya rugung, calabang tamumu,
Butlig-butligan ya, anting apimpuyu,
Butul a culantru, pabucal dang ustu,
Itang pibucalan, queca da iimu.

xxxv
Atin la pang ‘sabyan, detang CULIÑAYAN,
Casingitsingitan, carin la magbusal,
Itang quecang tacbang, anti ca mong sacang,
Banabanayad cang, titipa quing eran,
Maguing lucluc ca man, e dapat bibiglan.

xxxvi
Iting culiñayan, ala yang panulu,
Sasaup ya canu, para pangontra mu,
Nung atin cang sugat, medyu delicadu,
Cabud ya pin lunto, e man manabisu,
Iti ing Sundalus, ning catauan tamu.

xxxvii
Ding ASIAG qng mata, deti delanan la,
Malati lang nana, gilid na ning mata,
Deti quing sabi da, nung mica asiag ca,
Careng mamilansan, tutuliran mu la,
Quing lalam bale da, tutung MAŃILIP ca!

xxxviii
Itang quecang gauan, ba na ca pin lacuan,
Sucle iyang cuanan, bigla meng gayuran,
Metung pang paralan, a dapat mung gauan,
Irap ing putputan, asiag tuqui ya ngan,
At capilan pa man, MAÑILIP TUCNANGAN!

xxxix
Másaquit quing atian, ing MIYALIMUMAN,
‘Tang capallian-pallian, bigla nang minuran,
Agad mung sengaban, angin na ning uran,
O caya liclucan, gabun miuranan,
Tacla’t sumuca man, itang cararasnan.

xl
Ilaga da cang tia, at queca paynum da,
Sayasayucut ca, at saysing-saysing pa,
Maglungcut-lungcut ca, at berat-berat pa,
Migaganaca ya, itang quecang matua,
Canita mangan ca, Misua guisa naya.

xli
LALAGNAT na ca man, ustung atin amiam,
Ing agad dang sabyan, lagnat dagul mu yan,
Pero ing catutuan, mayna ca catauan,
Mata mung malalam, cucu-cucu ca man,
Maca sambra ca pang, asana quing cacapal.

xlii
Pero ing tutu na, bisa cang mamita,
Itang quecang matua, biglang sali na ca,
Bisquit detang Fita, deboting Mirinda,
Agad cumayap ca, malagad mu ita,
Neng mung masaquit ca, tutung ispesial ca.

xliii
ASIAG DING TAMUMU, ing saquit e biru,
Calaba da rugu, tagquilan ali mu,
Ilang ayabuang mu, lumasa cang tutu,
Saquit e magcanu, mangalbag cang ustu,
Miyaliuang Santu, ilang pañausan mu.

xliv
Alang panulu man, caring piasiaran,
Itang camandagan, masiring mataram,
Ing carelang aguan, sacali dong uluan,
Agad dang cudcuran, itang taclang ipan,
Cascas da’t itapal, careng piquinisan.

xlv
Atin pang miyusu CURICUNG la lagiu,
Laganas balat mu, nanacnac ya rugu,
Anti ca mong asu, pulgasan a todu,
Manga na pusad mu, misara’t sasayu,
Gamus e calaru, quing gatal pin ustu.

xlvi
Potang dadalumdum, carin la susumpung,
Gauan ng Indu mung, e pin mipandatun,
Bañusan na ca mung, pebucal a danum,
At “Caladrill” rugung, panûlung curicung.
Cascas ng Indu mu’t, bigla ca magdatun.