diosa ning paninap

07/05/2017

cauatasan capampangan

binibini; lacambini@siwalangsinukuan

binibini; lacambini@siwalangsinukuan

 

diosa ning paninap
almario ‘amor’ de Jesus

“Iparikil ke keca, o malugung Diosa
Ini nang gale cung misapwac king sinta
At nung damdaman me, isipan mu sana
Ing ating lulugud, keca mal cung Diosa”

Capitangan na ning bengi, apaninap ke y Diosa,
casiping ke ketang duyan, magyuyung mitmung ligaya,
itang malagu nang lupa, careng tacde cu painawa,
cabang ding adwa cung gamat, panaguran de king sinta.

At dindam cung milingat ya, kinaul na cung matalic,
ing pali ning catawan na, lulub cacu’t manialicsic,
anya e cu na pinigil, panamdamang misnang bagsic,
anting ayun dadagundung, at siguadang sinagitsit.

Ding bunduc mengatugan la, melingongo la reng ayup
Itang danum ketang ilug, anting bulus a minagus
Deng damulag keng tacut da, memulandit asna calyap
At ing bugsu na ning angin, pati bulung mengalagas.

Caibat na nitang silacbu, mipase ya ing catawan,
menimawas cung marimla, ketang pagal a delanan,
menahimik ing cabengian, alang selita nanu man,
keng pamicaul ming Diosa anting alang camatayan.

Neng mamun ne ing masala, at datang na ing dalumdum
Horas na ing painawa ca, keng obrang patiting-apun
Pangapiac da reng mata cu, isipan dana ca Diosa,
Panayan cu ne’y Morpheus, bang maninap king ligaya.

 


 


ditac namung pamagsane

05/05/2017

cauatasan capampangan

bombilia

catalaruan@siwalangsinukuan

ditac namung pamagsane
— almario ‘amor’ de jesus

Sigue abe’t caluguran, dagdagan ing pamagsane,
At malagua cang mabiasa, pamanyulat at gumale;
Sigue pucpuc, at ipali me, anti ca mu waring pande,
Agyang masyas ya ing bacal, a yaliwa me ing aske.

Nung lalalang cang poema, macanyan ing kecang gawan,
Mamili cang buring tema, yta ing planu mung tucyan,
Detang amanung balu mu, caban ning isip misimpan,
Calcalan mung mirarapal, paca-simen at samasan.

Ding misulat balican la, nung ating dapat ibayu,
At ituki la king Rima, dalit mu lang anting bersu,
Bilangan la reng sylaba, lapat mula ketang metru,
Ing santing na ning lelang mu, manayun yang siguradu.

Anya ngening balu mu na, mayan ing gagawang poema,
E na ca sa micacunu, sigue magumpisa na ca,
Deng abe mung talasulat, a poetang menimuna,
Ylang maging cayantabe, bang king Amanu mabiasa.

 


 


tumwa ca sang ating ketuan

05/05/2017

cauatasan capampangan

maili©siwalangsinukuan

anac@siwalangsinukuan

 

tumwa ca sang ating ketuan
almario ‘amor’ de jesus

Dirimla na ‘ing gatpanapun,
Parulum ne itang bulan…
Ing cabengian a daratang,
datang alang capilisian.

Kening kecang meging bili,
Madalas ing maliliyari
mimisip na cang parati
ketang suluc magtamimi.

Babalican ing milabas,
Ytang swerti at ing malas,
Yla ngening meging bacas,
Kening bye ala nang bucas.

Detang taung liguran mu,
Ala na la keng siping mu,
Minuna na la at mecu,
Licwan da na iting yatu.

Menaliwa ta itsura
Alus e mu akilala
Ytang aske mu canita
Linaut at tinabug na.

Dapot agyang macanyan man
Ating bage e kelinguan
Ing turu da ding Pengari
caring anac da at suli……

 

 


 


ibuat me ing curus mu

23/04/2017

cauatasan capampangan

lumbe©siwalangsinukuan

lumbe©siwalangsinukuan

 

 

ibuat me ing curus mu
sherwin dizon (tawling disipulus)

 

1.
O’ Ibpa cung Dios ot cabayat naman,
ning curus mung binie cacung pupusanan?
Sucdul na pu uari cacung casalanan,
ban tanggapan cu pu iting caparusan.

2.
Bubuat que ing yatu anti cu cang Atlas,
alang calma qng bie pane mung damalas,
qng camatutuanan meybug nacung matras,
bili cu ne’ing curus lacuan at tumacas.

3.
Mequibat ing Guinu “Anac cu, queni ca!”
E mucu gulutan at misabi cata!
Balu mu naman na caluguran daca,
ica pang anac cung e cu apibata?

4.
Atsu cu mu pane qng cagulutan mu,
curus mung pusanan acu ing sasapu,
neng e muna agyu acu ing susuyu,
nung misaquitan ca misasaquitan cu.

5.
Antayu ing quecang casalpantayanan,
nucarin ya ngeni ing quecang cabiasnan?
Ot cayna da naman e mu la paganan,
tiru cula reti e mu cacalinguan.

6.
Ibuat me ing curus mu acung manalale,
at lumacad tamu dalan ning tagumpe,
nung nucarin atsu ing pasbul na ning bie,
carin malualas na mipaldan nang tune.!

——-


pinatubo

23/04/2017

cauatasan capampangan

biseru©siwalangsinukuan

meulila; lumbai©siwalangsinukuan

 

pinatubo
sherwin dizon (tawling disipulus)

 

1.
Caugtuang aldo ing pisac ticpan nane iting sala
nung uari mo migbengi na qng oras a ita
ing singo’t bawu ning abu ibat bulcan micalat na
anya ala nacang aquit qng dalan a macalual pa
bisa cang saling pamangan ding tindaan saradu la
e mi man apiadianan uling biglaan canita

2.
Aquit mu ing uran atin samut matuling a burac
ibat qng bulcang manablas careng dinapat marauac
at ngeni e da mo balu macananu de iaplac
ing mua ning mag albarutung bulcang binang macasindac
acbung nang mag alingongo a sariang macapangaclac
ding peturan nang mangaplas ila ding anac a quicquiac

3.
Ninu naman maniuala caybat ning burac batu ne
memanuran meteng batu mangalampag careng bale
batu batu pin qng banua ing mituran e maglele
uli ning misan atin pang mibagsac a batung mabie
mialiua liua la pa dagul, itsura at cule
nung mibuculan ca queya ayacua mu pang cumabie?

4.
Cayari na ning pinandit at oras a milalabas
anyang linual caming misdan ot cabud mumuran balas?
macaniti namu uari ing bugnus na at ing ablas?
na ning bulcan pinatubo asna pin naman pangaplas
maquiagnan pa ing bagyu quening bulcang mamaglimas
careng dinat nang papalual ibat ambocang malualas

5.
Pak–! nganang binagsac nitang yeru quetang cagulutan
ning bale mi qng bayat na ning balas e na ayaguan
at miragsa ne ngan buu ing yeru a mebayatan
itang manuc e patugut magpalpatuc anya naman
quinate mine mu iti ban atin mung a ulaman
pablasang e murin milual e macasaling pamangan

6.
Atin linimbun a Virgen Maria qng bale canita
macatacda yang ilaco quetang aldo murin ita
oneng e na pa misundu uling qng maliliari na
carin macasiclod cami icami ngan mipamilya
pangadi mi e paburen ing milapit qng sacuna
at antabayanan sana ning Dios a mayupaya

7.
Cabang mamangan cami , Pak–! nganang lagitic ning bubung
qng penandam ming lagitic icua mi ngan ginalunggung
e mina balu ing gauan matras cami o sumulung
pota nung qng bayat na pin ning balas queta qng bubung
miragsa ne at mibagsac iting bale ming cacanlung
migsabi ne y tatang mi magbacwit namu’t dumulung

8.
Lalacad luluyun cami qng ciudad na ning Angeles
madalumdum at ing balas uran cacapal qng dalan
tualya ing putung qng buntuc at mitatayid cami ngan
misan quiquilican dacu adiang dacal bibitbitan
qng macabang pamaglacad miras murin qng puntalan
at dening camag anac mi icua mila murin disan

9.
Salamat pu O’ Dios co! at e yu que pu peburen
salamat mu naman atin migdatun quecaming Virgen
micabus murin qng bulcan at icami ing binanten
dacal man mesirang lugal lalu na ding sibabalen
milaco la man cabyayan at balayan ding memalen
mipacde at mipacde pa! ing Guinu atsu yamu quen!

———


icang taguimpan cu

05/02/2016

dampul ning leguan@siwalangsinukuan

icang taguimpan cu
diosdado p. cacapagal

Balen Baba, Capampangan
Dinan da cang dalit malagung dalaga,
Qng dalit ning pusu’t apsi ning caladua;
Dalit ning panirug, ning lambis at sinta
Ba cang mipatudtud busal ding sampaga.

Ining panandam cu, mapaling-mapali,
Balisa, malisuas, uling ining ngali
Busal ning pusu cu icang queang buri
Panaplac qng cau ning palad cung saui.

Tapat ing pacamal, uagas ing pigagap,
Banal ing layun cu, taimtim ing jangad,
Nung mabigu iti’t misiual cu palad,
Buri cu pang buri qng aun cu culdas.

Nanan que ing yatu nung aliua ica,
Abe cu busal ning samiu na’t ligaya,
Nanan cu pang tula nung e ica sinta
Mayap pa canacu maco na inaua.

Inia mamung virgen ning cacung paninap,
Ilingus mu cacu malugud mung sulyap,
Ining dusang dacal ban mapauing ganap
At ing caladua cu acua nang mimasmas.

__________


e naman malagwa

23/08/2014

cauatasan capampangan

macudta; poeta©siwalangsinukuan

macudta; poeta©siwalangsinukuan

 

e naman malagwa
bagse ning kailugan

Sana mu man pu apatiman da kayu?
ing malwat nang nasa ning keko susuyu
kulang ya man sangkap, ning lutung rekadu
kapanupayan yu, adwan karing bibu.

E naku man bansag.. mamuklat mangalkal
karing budning libru, tiktak king kakapal
pota apirat ke, agabak ke petal
ing maging kaulian, masakal ku batal.

E naku man pu, batirung mamoesya
ining kaku widu, anti mung pantasya
e ku rin makudta, ning bunduk alaya
manima king ilug, ing kanakung sarya.

Kabang babagse ku,king putut kung bangka
ing aslag ning bulan, iyang kakung sala
bibie kakung giya, king ilug kung mana
nung nu la ring grasya, king lambat ‘sa makwa.

Nung ing talamitan, iyang artikulu
kelangan matindi ‘ya isyu ing buelu
dapot maka-ustu, ing bitbit mung kwentu
ban keka matras la, dilang mananansu.

E naman malagwa, ing makipag-duelu
basta ing pukpuk mu, pane ya king sentru
sablang panalangin, balas e magpalsu
ban kalaban tusu, keka magimputu.

Ing abang tagimpan king mal kung balayan
ing makasawup sa’, king amanung sisuan
nanu man ligligan, kaku yang paklaban
e ke’yti pabustan, anggang kamatayan.

Ngeni pa lisya na, kekong sablang mapia
pakibasa na pu, ing lelang kung kudta
nung e la pa kasya, ding kakung kinopya
paki-kalbit yu ku, ban ku’ring mabiasa.

_____________