metuang tambilala

diua ning taguimpan©siwalangsinukuan

 

metuang tambilala
— melencia ‘mely’ catacutan

Metung a penganak meragul kanauan,
Nanumang obra bale ‘lang balung gauan.
Dakal la kasaup nanumang kailangan,
Ating labandera’t maglutung pamangan.

Ing sablang buri na mibibie ngan kaya,
Uling ding matua na manaua ing bie ra.
Qng pangabait na .anggang meragul ya,
Ala yang liliuan ketang pagkabie na.

Qng pamagaral na meyari aliya,
Melulun ya karing marok nang barkada.
Pablasang ya kabud ing meging anak da,
Mipanusignan ya king sablang buri na.

Ena aisip man ing maging bili na,
Potang mangamate ding aduang matua na.
Epin kelambatan mengasakit na la,
At ena meluat meuala na’ing ing bie ra.

Kanyan na aisip ning ulilang anak,
Nung nanu kasakit ing pangawala ra.
Pagkabie na niti mengapisali pa,
Din’tang ing aldo jalus magpalimus ya.

Kening kabilya na alang balung daptan,
Alang obrang luban alang pegaralan.
Anggang kasaup na king pibale-bale,
Tunggal-tunggal meko ala nang mitagan.

Kanyan na aisip ning babaing anak,
Nung nanung maliari king bie nang melugmak.
Ing tauli nang sisi ala nang marapat,
Alang balung obra, alang akarapat.

Ing pepalayo rang bugtung a anak da,
Linto tambilala alang balung obra.
Ninung asisi na ning ulilang anak?
Nune ring matua nang sobra lugud kaya.

Tambilalang anak ngeni makalunus,
Manampil mung pinggan sawil na pang gauan.
At neng mamipi ya sariling imalan,
Daraya ne gamat ena alinis man.

Ing aral na nining kanakung poesya,
Itamung pengari ituru to sana.
Anggang malati la isane yu nala,
Balang e daragul alang balung obra.

 

---