tingiran mu ing panalangin, o ginu

manalanguin@siwalangsinukuan

 

tingiran mu ing panalangin, o ginu
— marc anthony yambao cenizal‎ 

Tingiran mu ing
panalangin ku, O Ginu;
pakiramdaman mu
ining kakung panalangin
uli ning makatuliran ka;
pakibatan mu ku uling tapat ka!
E mu ku yayarap keka
ban kekang litisan;
tau ke ngan makasalanan
king kekang arapan.

Kalaban ku e na ku tiknangan
tutukian at lubus na kung deigan.
Binili na ku king
madalumdum a sukulan,
at meging kawangis ko ding mete
king panaun a milabasan.
Inya maibug na kung sumuku;
milako ing kakung  kapanayan.

Gaganakan ku la ding aldo milabas;
gaganakan ku ing sablang kekang depat,
isip-isipan ku
ing sablang gewa mu.
Tatas ku la keka dening
kakung gamat
king panalangin;
kalupa ning malanging gabun
kakau ya keka
ining kakung kaladua.

Mamalagua kang makibat kaku, O Ginu!
Mepupus na ing sabla kung kapanayan.

E me sasalikut  ing sarili mu kaku,
nung ali kayabe ku karetang
manabu king tuknangan da ring mete.
Ipanganaka mu kaku balang abak
ing lugud mung alang kupas,
uling keka ku magtiwala!
Ding panalangin ku miraras  la keka;
ituru me ing dalan
a kailangan kung tuntunan.

Iligtas mu ku, O Ginu,
karing kakung kalaban!
Keka linapit kung manintun salilungan!
Uling ika ing Dios ku;
ituru mu kung mamintu
king kaburian mu!
Maging maganaka ka sa kaku,
karing dalan a alang panganib
patnubayan mu ku.

Alang-alang king pangaku mu,
O Ginu, iligtas me ing bie ku.
King kekang kayapan
anguan mu ku karing kagutgutan!
Uli ning lugud mu kaku
paten mu lang kalaban ku,
at gisanan mu la
ding sablang manalipusta kaku
uling talasuyu mu ku.

 

---