ing magmamaticas: john bendido

ing magmamaticas
— john bendido

Ining John Bendido ing magmamatikas,
Kalupa neng batikan, kulang ya balasbas,
Ustung pelantik me, lulundag yang matas,
Akit n’ya pamitik, agad yang mamatras,

Ining John Bendido ing magmamatikas,
Anti yamu tatso king babo ning biyabas,
Manakit yang geydu, agad yang maliswas,
Ustung tiradol me, sulapo yang matas,

Ining John Bendido ing magmamatikas,
Mengari ya wari, bunga balasenas,
Nung pagmamasdan me, makaba ya tabas,
Pero sapuldung ya, penginis yang panas,

Ining John Bendido ing magmamatikas,
Nung baga keng lara, atne king kaparas,
Pero itiltil me, keng apalyang layas,
Alakang alasa, gang ditak mung paras,

Ining John Bendido ing magmamatikas,
Nung timalaran me, puganti yang takas,
Oneng nung keng laban, akit ne’y pagtabas,
Agad yang salikut, magtambun yang ulas,

Ining John Bendido ing magmamatikas,
Anti yang ubingan, ausan dang palaspas,
Bigla meng adalpak, keng tulid ning lawas
Manyalikadkad ya, mate ya keng balas,

Ining John Bendido ing magmamatikas,
Limbad-limbad ya, anting ayup denas,
Ustung dinugpa ya, bigla meng besibas,
Ene makatuktuk, keng pale at abiyas,

Ining John Bendido ing magmamatikas,
Ketang dumulaga, masanting a bikas,
Ot pengayidkid ne, ketang lalam kamiyas,
Oyta mebante ya, ketang geydung texas.

 

---

 

bale alang lande

bale©siwalangsinukuan

 

bale alang lande
— john bendido

Mipabalikid ku keng kakung delanan,
Bale yang sawali kakung apansinan,
Atin yang banggera ampo pang batalan,
Atin ya rin barkun ampo pang dalikan,

Itang kayang eran atin yang guyabnan,
Atin lang aldaba detang kayang awang,
Pakatunging palat ing kayang bubungan,
Makadingding neman keng timbung bilbalan,

Keng pamamilang ku pitu yang balitang,
Ing kayang lambale saktu meng suklaban,
Metung ya kuwartu saktu yang pagkeran,
Adwa yamu pasbul kilub ampong kilwal,

Panyatang ning bengi sulu lang paritan,
Detang makasindi kildap kildap noman,
Dapot ing sasagi keng kakung kaisipan,
King aldo at bengi alang makatuknang,

Makanyan ya wari’y balen kapampangan,
Atin yang amanu nung e me gagamitan,
Bale alang lande kayang kalarawan,
Layang kabaldugan kayang kaukulan.

 

____________

masaiang baiung banua

ganing-aldo@siwalangsinukuan

 

masaiang baiung banua
— john bendido

Mabilis ia durut ing iatung tucnangan,
Labing aduang bulan mabilis dinalan,
Quilub ning pabanua e ca mengainipan,
Mapupus ne pala e mu apansinan,

Macanian ia bilis mitas ing idad mu,
Anti ia mung cagpa dumalan quing bie mu,
Nung acupadu ca pa caniang gagauan mu,
Ing aldo at bulan daragdag quing bie mu,

Ing bauang a ini lacuan tane naman,
Panibaung banua iang quecatang luban,
Nung suliapan me ing bauang delanan,
Dacal cule ning bie ing quecang biltangan,

Ngeni tuclu tamu queng panibaung banua,
Baltangan ta ia mengari mong parua,
Ing bie tamu sana magi iang sariua,
Anting berding bulung ing bie ta minaua.

 

---

 

dening ortelanu….

ortalanus©siwalangsinukuan

 

dening ortelanu….
— patria bondoc david / augusto m. reyes
— john bendido / edna angeles

pamitalamitan deng watas

augusto m. reyes:
Karening uyat ku mamagus ing daya
Na ning ortelanung tantu king kaluka
Dapot maluka man ing karinang bina
Lipakan kung palad ding babiye biyaya.

patria bondoc david:
Anti ku nang ikit ing sipag mu’t tyaga,
ketang panaun mu, pibatan mu yata,
kareng amanu mu,  ‘me kung ayulata,
balu mu ngan pala, ing bie keng taldawa!

augusto m. reyes:
King bie ku kanita misapwak ya’ing amun
E ku kabangkabang magobra king gabun
Dapot ining pusu aggiang pang linimbun
Mibalik ya mu rin datang ing panaun
Nung nu ya paynawa pangagatpanapun.

patria bondoc david:
Uling masanting ya , iyang kekang layun,
e ya kabang kaba , tatalan kang gabun,
ikwa mung meyari , king sakit ning amun,
kapamilata’na ning giya mu’t padrun.

edna angeles:
Nyaman yung pakiramdaman,
mala balagtasan kekong sasambitlan.

augusto m. reyes:
Mianad ku pin ma’p king obrang asikan,
Apulut ku keni ing kapibabatan,
Anya keng lebasan papunta king ayan,
Ala la reng suksuk aggiang matibu man.

augusto m. reyes:
Meyari ku man pin at mika diploma,
At e man melambat mika lisensya pa.
E ku man meinip king pamanintun obra,
Uling ining obra yang kaku menaya.

patria bondoc david:
E man pin sumbagal , yang kekang lebasan,
king pamag tamasa , king kekang larangan,
ngeni adwang gamat mu yang tatamasan,
kambe ning pamilya at kang apung TIMANG .

john bendido:
Tune manaluntun kening kakung diwa,
Keng milabasan ku kakung kayagpangan,
Matalas yang lingko pane kung tatalnan,
Makibatbatan ku mayap keng patasan

patria bondoc david:
Maski nu na ka padpad ning kapalaran,
e muna adayu ing e mu gunaman,
ing kekang ibatan ortelanu misan,
manatili pa mu rin, angga kapilanman.

 

---

 

ing patac ning uran

patac ning uran@siwalangsinukuan

 

ing patac ning uran
— john bendido

Cabang mamatio cu, queng auang ning bale,
Pinatac ing uran, quing bandang marangle,
Bigla cung mipasno, medilig ing pale,
Ampo reng tenam cu, miaialiuang gule,

Ara pin deng matua, maniese tanaman,
Patac na ning uran, megui ia pang siam-siam,
Detang ortelanu, maluat dang panaian,
Mugnus ia ing uran, quing carelang tenam,

Patac na ning uran, atne quing caniaman,
Careng ortelanu, maniese tanaman,
Dapot deng mamilad, pale quetang dalan,
E meging manaun, carelang panamdam,

Dapat tang tandanan, patac na ning uran,
Ini pagcalub ne, ing laganas ia ngan,
Caretang e bisa, ali ie tatanguian,
Datang din ing aldo, ume ieng cailangan.

 

---

 

misan miglolo ku

baintauu©siwalangsinukuan

 

misan miglolo ku
— john bendido

Misan miglolo ku bandang Cabanatuan,
Itang kayang lagyu Vivian matimtiman,
Telan ke king salu angga na king atyan,
Pebaba neng bagya disnan ke’y manyaman,

Saksi ke i Teban dagis king pisamban,
Pakasal ya kaku Vivian a galisan,
Tigsa na keng gulut kalat la keng atyan,
Sagad la keng tundun angga keng bumbunan,

Vivian matimtiman e mamangan sagin,
E ke man apilit na mangan yang sagin,
Anyang atakman ne ing yaman ning sagin,
Anggang matudtud ya tatalnan ne’y sagin,

Anyang dala kune balen ning magalang,
Keng kubung malati ketang apung basyang,
Anyang panuman ke paglukas ke malan,
Digsu kun’ya pete bakla yang bulugan.

 

---

 

poesiang putut-putut

putlud; putut©siwalangsinukuan

 

poesiang putut-putut
— john bendido

Ining poesia cu, poesia putut-putut,
Ini Belangcas que, queng bolpen cung putut,
Ginamit cung papil, ielou pad iang putut,
Sulu cung masala, bigla iang meputut,

Caputut iang bangcu, ing cacung luclucan,
Ing lamesa cu, caputut ia naman,
Bigla iang meputut, poesia cung gagauian,
I Doming a putut, bigla iang dinatang,

Pequilaban que, poesia cung putut,
Aniang ating contest, quing calsada putut,
Meputut la tula, at biglang melungcut, Ing contest meputut, mitucnang na cabud,

Ing canacung piniambut, caputut iang atbu,
Caputut iang palang, itang penalip cu,
Caputut a tabu, ing piangusan cu,
Caputut a suput, ing pibalutan cu,

Minta nacuman, queng putut a sapa,
Ing darala cu, caputut iang pana,
Caputut iang asan, ing canacung icua,
Caputut a suweque, carin dinapuc ia,

Inuli cu nenam, queng putut a cubu,
Cawali iang putut, ing pipaglutuan cu,
Caputut iang dutung, itang penangab cu,
Calang iang caputut, ing pitangaban cu,

Ginamit cung sanduc, caputut ia naman,
Tsaka que dinapuc, queng putut a pinggan,
Tsaka que inapag, queng putut a dulang,
Ing pusa cung putut, teginis naneman,

Penagal quepin, ing pusa cung putut,
Sabe iang quinaung, ing asu cung putut,
Eco mabibitin, bigla iang maputut,
Ining poesia cu, poesia putut-putut.

 

---