irvin harvey rivera (siuala ning maliwalu / anac ning baculud)

Bait ia i Irvin Harvey Rivera carin queng Menila. Aduang bulan ia pa pesese da ne ring pengari na caring pengari na ning igpa na queng Maliwalu, balaian ning Bacolor, uli’ng canita pareu la’ng manintunan Menila ring pengari na. Megaral ia Mababang Pipagaralan ning Maliwalu (Maliwalu Elementary School) nu’ng nucarin a maestra que i Poetisa Laureada Dolly Gigante-Ferrer at aniang mamacbung ia ing pinatubu migpalipat-lipat iang iscuela at meari iang elementaria queng Mababang Pipagaralan ning Potrero (Potrero Elementary School) queng Bulaon, at Matas a Pipagaralan ning Potrero (Potrero High School) ne man meiaring hai-iscul (high school) queng mu naman Bulaon. Megaral na ne man coleiu queng Pamantasan ning Asampsiun (University of the Assumption) queang Sampernandu, at capamibulalag pangmalda (mass communication) ing quinua nang cursu. Metung ne mung semestri maiari na sa, o ne’ng queng casaquitan ning bie at canitang panaun a ita atin neng asaua at cabulanan na ning asaua na’t manganac ne, ania ing miliari tinucnang iang megaral ba’ng mamie dalan at biaian ing sarili nang pamilia. Hai-scul (high school) ia pa mu mailig neng susulat poesia at mengarap ia naman maguing diornalista ampo’ng columnista datang yng aldo ania macanian iang quinanguang cursung mass communication at susulat ia naman mapilang column queng amanung Capampangan. Ing lugud na queng Amanung Sisuan iang meguing inspirasiun na caring poesia na. Casalungsungan iang macatucnang carin queang Bulaon Ressetlement cambe ning asaua na ampo ring atlu rang anac.

———–

ing pait ning napun

gagaga; quiquiac@siwalangsinukuan

 

ing pait ning napun
— irvin harvey rivera (siuala ning maliwalu / anac ning baculud)

Binang masalusu ing aldong babatyo
Anting pamigunam a kabud tinando
Napun at nakadwa yang pilit papalto,
King panamuyut na ning masayang aldo.

Napun at nakadwa, anti n’yang taguimpan
A sukat magmain–pilit mung ukulan
Busal ning paninap, dane ning aslagan,
Ding masayang aldo layun ta’ng balikan.

Nung atin mang memun piju yang mibalik
Muli ya at muli keti babo’t sulip
King diwa ta’t ukul, king dusa ma’t pait,
Mie tamung payapa’t mikawul matigik.

King karinan na ning Guinung Mayupaya
Payapa ing bie at makapagmulala
Ding memagsipamu’t miglubas king tula,
Menawa lang mie at kinabyeng makaba.

Keti sulip naman a mineng migmalun
Malugud king bie ra a memagsipamun
Tantu yang masakit ikutkut king gabun,
Pamigaganakang dinukit ning napun.

 

---

 

anac na cu ning capampangan

bunduc ning arayat@siwalangsinukuan

 

anac na cu ning capampangan
— irvin harvey rivera (siuala ning maliwalu / anac ning baculud)

Calati cu pa mu, labitlabit na cu,
Ngara mo uari ring macaramdam ca’cu
Mengari cu canung culasisi’t loru
Nung magsalita cu, daig que pa’y ‘Ma cu.

Nanu mo canu ing pengaias dang dila
O’bat nacung ‘tulid qng pamagsalita?
E ra ia ta balu qng calati cu pa,
Pacsabian da na cung matulid salita.

Ining ca’cung Igpa a magsasa-Uatas
Capampangan ia ing buri nang paguingcas
Bang datang canu ing panaun at oras
E ia malumpaui ing sisuan nang gatas. (Amanu)

Ania naman ngeni, metung a dengalan
Ing Anac nacu ning daing Capampangan
E ra mo asabing Anac cu ping daiuan
Uling Amanu cu, Tal iang Capampangan.

At caretang sablang calupa cung Anac
A lalabitlabit cabuclat ning abac
Magaral tamu at dungdung ta’ng matactac
Qng pamagaral qng amanu ring tanac.

Caretang pengari caring sibabale,
Ing Capampangan sa’, e ie picarine
Turu la ring anac ‘saca io ipande
Qng Amanung Sisuan, magsilbi cong gabe.

---

 

maningning nang leguan ning balen baculud

ing bunduc queng aslagan @siwalangsinukuan

 

maningning nang leguan ning balen baculud
— irvin harvey rivera (siuala ning maliwalu / anac ning baculud)

Luid ca! Oh Balen cung tutung pacamalan
Talacad na ca qng matindag mung leguan
Saganan mu la ring batuin qng catasan
Miumang tinipa at caiabe ning bulan.

Lubasan me’yng quecang mapait mung tangis
Malungcut mung gale caring rima’t sunis
Ibalic mu la ring maiumu mung lambis
A misimpan-simpan qng lugma mu’t aclis.

Ing mau mung pusung manaptas paninap
Ala iang patna qng caiang pamagdulap
Ding masalang batuing migpanpan qng ulap
mengatda la ningning qng dudul at quildap.

Yng dati mung leguan at matibeng asias
Lesac ne ning quecang malungcut a paldas
Istung balang ume cang sambitla’t guingcas
Sasaguiua ngan ing sablang mengalabas.

Dapot qng maraiu mu nang pamaglacbe
Minuli cang masias at meguing matibe
Acacaquit cu’yng sala at ningning mung tagle
Caring quecang timan, dalit mu at gale.

Ume cang talacad dane ning aslagan
Manaptas paninap ampo pang taguimpan
Masalese mu lang piabaiabaian
Ding batuing masala, sumlag la mu naman.

 

---

 

daque (lugud ning indu)

indu’t supling©siwalangsinukuan

 

daque (lugud ning indu)
— irvin harvey rivera (siuala ning maliwalu / anac ning baculud)

Sipuac na cu queti qng sulip ning iatu;
Peragul na cu qng lugud na’t panaru;
Mata cung macapiac milagat cu no mu;
At ing sala ning bie, pepaquit nang Indu.

Matarling ing balang siuala cu’t tanguis;
Ding gamat nang Ima cu ilang minapis;
Malaleng minuma ia cacu’t miglambis;
Bucud nacung Anac a alang cauangis.

Ding tumaila na neng abac a maranun;
Ilang pacatudtud nung e mipaindatun;
Ding utang cu caia a misusun-susun;
Pacatandanan cu la cabang panaun.

Ding timan at aili a e na asucad;
Mabut no qng bigua a lilimpad-limpad;
Ing binie nang tula cacu queti labuad;
Capilan man e cu calinguan at lingad.

Qng carulumdumang babatio albugan;
Pipilan na la mung aldo’ing mitatagan;
Sasaquit ing bie at lalbug ne ing bulan;
Anggang binit que pang ipuc qng canauan.

Cabang atiu ia pa quening cacung lele;
Gauan cu na’ing sablang bague masalese;
Uling ala nacung aquit Indung Tune;
A magmasabal at babie’ing caiang daque.

 

---

 

cruzada qng paniulung ning amanu

jose rizal@siwalangsinukuan

 

cruzada qng paniulung ning amanu
— irvin harvey rivera (siuala ning maliwalu / anac ning baculud)

E cu anting tanac o metung a biasa;
manundungang libru, pantas a Poeta;
bista man pin rugu at cacapcap cupa;
anting baiu-baiung susulat poesia.

Ditac cung caguiuan buri cung idaque;
caring caianacan magsilbing tinape;
piputut-putut da’t tiltil da qng cape;
magsilbi ne yting maragul a baque.

Nung talus da man qng bubut dang isip;
ninu pin caia qng Amanu maniagip;
qng malapit na nang misara’t mituclip;
a maluat da na ping papalbug ding lasip?

Dapot caianacan maguing matalustus;
asopan iu que sa’ng ibuat taia yng cruz.

 

---

 

 

yng aldo ning cainacan cu

lele ilug©siwalangsinukuan

yng aldo ning cainacan cu
—irvin harvey rivera (siuala ning maliwalu)

Mamaniungab ta’ qng lalam,
Lele ilug man daiatan
Mamagse pecamalalam,
Qng abut ning panimanman
Saluran ta’ ngan ‘tang calam,
‘Tang ‘gang babie nang cabiasnan
At nung tutu ping macagiam,
Pilmi mung balic-balican.

Ume cang magluiun-luiun,
Sagana ca caring alun
Calinguan mu nang magmalun,
Lundag-lundag patingapun
Quimo man e mipaindatun,
Mialigogo o maratun
Potang ume nacang mamun,
Sasaguiua yng panaun.

Yng panaun ning cainiacan,
Luiun-luiun, lipo-lipo
Patagan to ring ‘gang dalan,
Lacad-lacad sigpo-sigpo
Lumabas yng patingapun,
Alang aldong pacabatio
Muli cang pauas-pauasan,
Balic-balican mu’yng aldo.

——-