magaral cu queng escuela: poema para careng chiquiting gubat

18/09/2017

cauatasan capampangan

anac©siwalangsinukuan

anac©siwalangsinukuan

 

magaral cu queng escuela: poema para careng chiquiting gubat
jose roman reyes laquian

Magaral cu queng escuela
dacal bague ban mabiasa ,
pati queng Amanung mana
masna diua’t maqui rima .

Ing Amanung cacung Sisuan ,
Amanu cung Capampangan ,
Pamana Ding Pipumpunan ,
Masna ya Diua at Leguan !

Magaral cu queng escuela
ban cabaluan miragdag pa
qng Capampangan cung Cultura
at Nuan a Literatura !

 


 

Advertisements

y ima: poema para careng chiquiting gubat

18/09/2017

cauatasan capampangan

maglacbe©siwalangsinukuan

miinda©siwalangsinukuan

 

y ima: poema para careng chiquiting gubat
jose roman reyes laquian

Matudtud ya pa ing aldo
macagising ne y Ima
at pagsadia neng amusal
ing ortelano ming ibpa ;
caibat pag-bacalan ne pang
nasi’t asan maqui-gata ,
maniaman ya ing lutu na
ning mapaglingap ming Ima .

Quecaming micacapatad
y Ima mi , ya ing mestra
at ya mu rin maningat mi ,
labandera’t cocinera ;
yang mamalenque’t maglutu
queng pamangan ming pamilia ,
que bale mi , alus queang
gagampanan sablang obra .

Manatad ya’t sasalusun
quequeng anac qng escuela ,
masalese’t macaayus
balang bagueng gagaua’na ;
y Ima mi , masuyu ya ,
queng sipag ya ing mumuna ;
Ing quequeng Uwaran Ima
Quecami ngan malugud ya !

 


 


ing droga

18/09/2017

cauatasan capampangan

drugs siwala

pampapraning@siwalangsinukuan

 

ing droga
antonio mallari medina

Panulu ya kanu ining sasabian da’,
Matua’t kayanakan, ila ding suki na’,
Ngening salukuyan balen mamrublema’,
King metung a salut, pauli ning droga’.

Problema king droga, dapat solusyunan,
Dakal no ring taung ngeni miapektuan,
Perwisyung maragul, masakit larinan,
Ing marok a bisyu magdalang kasiran.

Ding “pusher” ning droga, awsan da lang tulak,
Ila ding magtinda, ilang mikakalat,
Deta naman “user”, atyu la king siudad,
King balen at baryu, akit tang laganap.

Deta naman “drug lord”, ilang mamuhunan,
Ing negosyung droga iti panibalan,
Ban ing paninda da dakal mangailangan,
Maging gumun la ngan, matua’t kayanakan.

King kekatang bansa, king balang suluk na’,
Malino akakit, ing droga titinda’,
Ding taung marawak, matuling kalad-dua’,
At ding kayanakan ila ding biktima’.

Ing gamat a bakal dapat neng gamitan.
Ning gubiernu tamu karing tampalasan,
Sisira king bie da at ing paintungulan,
Ding dakal a tau ning mal tang balayan.

…..


ing sona

18/09/2017

cauatasan capampangan

duterte siwala

pangulu@siwalangsinukuan

 

ing sona
antonio mallari medina

Ing SONA nanu ya? Yang ausan nang ulat,
Presidenti tamu, karin na siwalat,
Ing kanung kabilian, ning manintun lunas,
A indung balayan, bangsang Pilipinas.

King aldo ning SONA, karin akit tamu,
Detang senadores ampong diputadu,
Susulud imalan, tune lang magarbu,
Anti la mo wari mukyat entabladu.

Samantalang detang king lual ning Batasan,
Tyu la ngan mapawas, basa la imalan,
King mapaling aldo ampo nitang uran,
Magpilit susugud bang daing maramdam.

Ing SONA nanu ya? E ya pamarsala,
Karetang kalaban a makakulung na,
Meging ugali na, sisi keni’t keta,
Ing dake ning napun kakalkalan da pa.

Ing SONA nanu ya? Atyu ding pamalak,
Ban itang memalen masensu at munlad,
Masaleseng akit, ing aldo a saslag,
Atin kapanayan king masayang bukas.

 

 


 


pagnasan ta’ng kapayapan

18/09/2017

cauatasan capampangan

sangang tanaman@siwalangsinukuan

capaiapan@siwalangsinukuan

 

pagnasan ta’ng kapayapan
garry viray

saktu kupang mikaisip at magaral king iskuela,
ing prublema king mindanao, iti daramdaman kuna.
nanu kayang meging sangkan at nukarin megumpisa?
angga ngening salukuyan, iti pisasabian yapa.

dacal nala reng sinubuk manyalese king problema,
manungkulan king gubiernu, atin na muring artista.
reng kapatad king pisamban, pati reng aliwang bangsa,
dapot ala pang milyari, kapayapan alayu pa.

pilan nalang presidenting linukluk king malacanang,
pilan nala reng senador, liwas-liwas manungkulan;
pilan nala reng congressman, balik-balik king batasan,
pilan nalang negosyador reng kekatang pekisabian.

dacal nalang mengamate, king libutad ning labanan,
dacal nala reng pamilyang, mamaglikas a tukngangan.
dacal nalang apektadu, kristianu o reng muslim man,
dacal nalang mengaranup at mengasira kabiayan.

ela ditac dening anac a mangulila king tata,
ela ditac ding babaying mangulila king asawa;
ela ditac ding pengaring mangulila king anac da,
ela ditac ding capatad a mangulila king koya.

capilan ta mikasundu, ban mituknang ing labanan;
capilan ta apiisip, ena ustu ing gagawan?
capilan tala ibili, reng armas a gagamitan;
capilan taya kaya kamtan, pagnasan tang kapayapan?

nung aku ing kekang kutnan, reng armas ela kailangan,
mas masanting nung pisabian, nung nanu ing dapat gawan.
nanu kaya ing buri da, ding kapatad ta mindanao?
makasaup kaya iti, nung kekata lang pabustan?

marakal la rening kutang, a dapat mipakibatan,
kailangan lang pagaralan, eta dapat mamirapal.
isipan tang masalese, bayu tamu gawang takbang,
bangkanita kamtan ta ya, pagnasan ta’ng kapayapan.

 


 


palis tingting

18/09/2017

cauatasan capampangan

palis tingting

palis tingting@siwalangsinukuan

 

palis tingting
garry viray

Abac pamung kagising ku, papalisan kunang tambing,
Itang bulung a melangi, kalupa ning bulung ipil.
Itang bulung na ning santul, pelalung ing bulung sagin,
Palisan at silaban ku, pati bulung kalamunding.

Ing melanging bulung biabas, akasanting papalisan,
Anti mu rin itang sukal, menibatan kareng cuayan.
Lalu na nung ing palis mu, masanting ya pitalnanan,
Potang gayud me king gabun, anti kamung mamyalungan.

Asanayan ku neng abac, pamamalis ketang sukal,
Umpisan ke ketang gulut, ketang arap at keng kural.
Lalam bale mamalis ku, angga ketang lele kanal,
Bayu ya sunlag ing aldo, apalis ku akarakal.

Dapot misan kagising ku, itang palis makasalbag,
Mikawani la reng tingting, itang tali pakakalag.
Tinipun ko retang tingting, ketang gabun la misalbag,
Susubukan kong itali, pane nomang makakalag.

Sibukan ke ining palis, itang sukal papalisan,
Dapot pamagkasakit ku, akarakal malalakwan.
Retang bulung a melangi, eku nala agayuran,
Pauli ning kakung palis, melwalas ne pitalnanan.

Ikwa rapang mengaputut, retang tingting a mapilan,
Pauli ning malambut ya, ing palis kung gagamitan.
Retang tingting kinwa kula, sibukan kulang gamitan,
Akasakit ing mamalis, itang sukal e megisan.

Migsandal ku keng luklukan, mimisip ku nanung gawan,
Bangkanita salese ya, ing palis kung gagamitan.
Kinanwa ku ketang tali, tingting kaku lang digdagan,
Mitali yang masalese, at metigik ya talnanan.

Kalupa ning palis tingting, miabe-abe tamu sana,
Eta mikawa-kawani, at eta mag kanya-kanya.
Bangkanita alagpasan, nung nanu man ing prublema,
Istung saup-saup tamu, kakayan ing sablang obra.

 


 


panig-patawad

18/09/2017

cauatasan capampangan

magpalimus@siwalangsinukuan

magmacalunus@siwalangsinukuan

 

panig-patawad
almario ‘amor’ c. de jesus

Yca ing sinabi, at kecang Amanu,
Parusang mipatung, caring nunu tamu,
E pa miwawale, yatu ne ing yatu;
Macanyan cabagsic, ing paintungulan mu,
Nung pane parusa, buri mu king tau,
“Ala na ing lugud, purus nang Impyernu”.

Manang casalanan, mipatawaran na
At ing meging bayad, Crus king Galgotha;
Agyang y Muhammad inyad na cang Allah,
Detang casalang na mipatawaran la,
Ketang depatan tang pamamugbug caya,
Ding tau king Ta’if, miligtas la sana.

Y Papa Benedict, dinalo Lebanon,
Panaung “Civil War”, yang capalipalian,
Nung buri yu ngana, ing catajimican
“Capatawaran mu, ing dalan yung tucyan”
At canita tucnang sablang cagutgutan
Labwad ning Lebanon, tajimic neng miuman.

Anti mung panyara, mamatawad tamu
Kecang caisipan, tucyan ne ing Ginu
At carin ta ackit ketang pamamintu
Yti macacayap ketang sarili mu,
At tanggapan taya masanting a premyu
“Bunga ning Patawad, lumaya cang ustu”