panenayan da ca

22/07/2017

cauatasan capampangan

pamibaiit ning dampu at lugud©siwalangsinukuan

dampul ning paninap©siwalangsinukuan

 

panenayan da ca
almario “amor” c. de jesus

Keng pamandayu na, ning sintang casuyu,
Anti neng migpaldas, ing kikiac cung pusu,
Ding balang pinandit, ning bili cung bigu,
Panan cu ing aldu, magbalic ca rugu.

Ngening ala na ca, dili cung malumbe,
Ing lingus ding mata, anting tagulele,
Neng benging tahimic, tudtud paintunan ke,
Caratang ning abac, e na mitiwase.

Lacwan dasan mu cu, king sale candungan,
Buri cung isipan, dit man e mu licwan,
Nu ca man mipadpad, nanu mang cabilian,
Ika, at Ika mu, dili cung palsintan.

Anya mibalic ca king Indu mung Tibwan,
Manaya ya keca, ngeni’t capilan man.

 


 


parangal kang totoy bato

22/07/2017

cauatasan capampangan

mangamanu, maquisabi©siwalangsinukuan

mamulosa©siwalangsinukuan

 

parangal kang totoy bato
sergio ‘sergs’ g. calayag

Kabang iyang pàrangalan, maganakang Totoy Bato
Dening mabanglung sampaga anting uran manganabu
Kalupa ning dakal grasya manibatan king Guinu
Aldo-aldo tatanggapan pasalamat ibie tamu

Polosador at poeta ila rening misanmetung
King Holy Angel university dakal lang tinagun
Kapampangan center of studies menimuna kening misyun
Ba nemang mipamatulan at matupad itang layun

Ninu wari’y Totoy Bato keni labuad kapampangan
Nanu kaya ing inampang keni lugal tamung tibuan?
Bakit iyang parangalan? Nanu wari ing depatan?
Ken larangan ning polosa, mekilala Ining tibuan

Y Rodolfo Laxamana, misapuak ya Sto. Cristo
Megdulap yang kabiasnan escuelang Sto. Rosario
Memasadang ya king checkpoint Ining maganaka ng tao
Tau ya keni Angeles, iyang tune Angeleño

Dening gawa nang polosa, ilang mangising keng diwa
Kareng taung makalaut Karin king Saudi Arabia
Potang ila nang damdaman dening malagu nang kanta
Itang homesick alabanan, sasaya la detang lupa

Deng sampagang mangabalag keng malapad entebladu
Makiyabe keng parangal kening matenakang tau
Tutu la mu king kalagad deng mididinang talento
Anti’ng Ari ning polosa, kalupa nang Totoy Bato

 


 


ing yumu ning panalala

22/07/2017

cauatasan capampangan

mimisip©papa osmubal

mimisip©papa osmubal

 

ing yumu ning panalala
almario “amor” c. de Jesus

Careng calupa cung linaut mindaywan
at malagad tutung dadalo king tibuan
Ing kecang Amanung ibat king beitan
lalu yang yuyumu e me acalinguan.

Ding balang pinandit, bibilangan mula
mamyalung king isip, ing bie king minuna
pusung gigiyagis, king pamanalala
kecang paninapan, miuli ca sana.

Muli cu balen cu, labuad Capampangan
Sale na ning sinta, ibat camumulan
Carin cu manaya, king kecang candungan
Ing tauli cung singap, keca ke pupusan.

At cabang ati cu, king lipat ning dagat
Amanu sesen ke a mitmung pagsalbat.

 


 


burarul

09/07/2017

cauatasan capampangan

susulapo@siwalangsinukuan

susulapo@siwalangsinukuan

 

burarul
garry viray

atin nang malati at atin maragul
atin kule ubi atin mu ring asul
sula-sulapo la angin ing lalabul
miyayaliwa la kule reng burarul

ing kakung burarul gewa ya king papil
potang patilon ke sampa ku pilapil
ining kayabe ku, asne keng kasutil
ing kakung burarul, misabit keng ipil

dapat ing burarul, makaba ya tali
makapal sinulad matibe yang pilmi
reng aliwa naman gagamit la tansi
ban kasulapo na tutu lang mawili

ing bie na ning tau balamu burarul
e paka siryosu, e murin ganarul
keng angin masikan, e ka pin paysaul
pota mabaldug ka, keng gabun mipukul

 


 


atlung tanaman a dutung

22/06/2017

cauatasan capampangan

aring bulan@siwalangsinukuan

bulan at tanaman@siwalangsinukuan

 

atlung tanaman a dutung
almario “amor” c. de jesus (ing agila ning apalit)

Ing aldo at bengi, malagwang linabas, dela ning panaun
Detang Atlung Dutung, ketang cabilyan da, anti lang melaun
Carelang paninap, ketang t’yu la bunduc, dela na ning anggin;
At misan a bengi, mumunang tanaman, biglang mipacde ya
“Mica gintung sala, bat metung a batwin, at miaslagan la
Ketang Lalabangan, ning metung a Anac, a bayung bait pa.”.

At yta nang Tata, ngana king asawa, gawa cu sang cuna
E sana macanyan, ing pipagkeran na, ning Mal a Bunsu ta
At telan ne gamat, nita nang asawa, ketang sinabi na,
Cabang ytang aslag, tala ning catasan, tatanglawan na la
Cacu masanting ya, ining lalabangan a ke’yang pagkeran
“Canita mebalu, ytang macalulan, Mal yang diling Yaman”.

Sisilim canita, metung a Maglacbe, ing banca seken ne
Detang caluguran, caya la tinuki, canatba la ume
Uli na ning pagal, keta nang sumanga, ot mipatudtud ya
Dinatang ing duldul, kildap at sigwada, mengatacutan la,
“Anya migising ya, tinas nu ring gamat at pepatucnang na
At canita lintu, Ari’ng banwa’t sulip, ya palang sake da”.

Biernes na ning abac, ing Catlung Tanaman, cabud mengasdan ya
Ding masyas a poste a menibat caya, cabud na kinwa ra
Yla ring megamit at megawang Cruz, inyang bitayan de
“Asna na casakit ytang panandaman, inyang pemacu re
Gamat ampon bitis, cabang detang tau, gugulisacan de
Ytang Catlung Dutung, lintu yang matsura, mabagsic yang tune”.

Aldu ning Dominggo, sinlag ya ing aldo, at lalam ning dutung,
Metula ing sabla keti king masala, at ing panamdaman
Nitang Catlung Dutung ngeni menaliwa, lalu yang metibe
king lugud na ning Dios, sabla mibayu ngan, king lugud a tune
Tanaman a dutung, e man peca matas , keti king Sicluban
“Ngeni abalu na, ytang Crus a dutung, anti yang Cadiosan.”

 


 


ing dila ning tawu

22/06/2017

cauatasan capampangan

tacpan la reng balungus@siwalangsinukuan

cuscus balungus@siwalangsinukuan

 

ing dila ning tawu
— almario ‘amor’ de jesus (ing agila ning apalit)

Ing dila ning tawu cailangan banten ya
Tictac ya cabasa ketang cabilyan na
Anya ing madalas mitataluras ya
Macapanasakit ytang lulwal caya.

Calati nang bage keng kekang catawan
Obat yang magdala keng bye mung dadalan
Ya ing maging sangcan mayap o carucan
Agyang malati ya e me pu lalatiyan.

Ca-alimbawa ne timon ning Pilotu,
Nung nun ne cabigan tuki ya ing barcu
O anti yang api ibat king palitu
Nung eca mimingat dagul micalucu.

Yng maruc a dila siran ne ing bye mu
Ala na cang galang careng parang tawu
Anya manginlag la anti cang demonyu
Nung e mu pilinan lulwal keng asbuc mu.

Gamit na ning Tawu tagleng gelingan na
Maca patunud ya patucyan buri na
Miyaliwng “animal” ayup at asan pa
Ing sariling dila e tutuki kaya?

Inya malilyari dilang maindredus
Dangalan siran na sobrang pamagbastos.
Alang pacundangan bunga ning depatan
Sakit a penandaman at camarinayan.

At neng mangadi ca ing Dios yang pupuryan
Adwan itang mayap pati caligtasan
Sumangid na nita dila anting sundang
Palmuran, libacan wangis ning Miglalang.

Deta nang tanaman metung meging bunga
Mangga ya ing tanam ing bunga mangga ya
Ing metung a dila deng bunga adwa la
Metung cayapan ya yng cadwa maroc ya.

Dacal a perwisyu keng sanga sangang dila
At keng pamagsalita ing casebyan ngana:
“Bayu ca manatsa natsa, magsalamin ca pang capsa
Ba mu rugung ackit Caca, mata mu king muri misna”

 


 


gintung pluma a pamana

22/06/2017

cauatasan capampangan

susulat@siwalangsinukuan

susulat@siwalangsinukuan

 

gintung pluma a pamana
almario “amor” c. de jesus (ing agila ning apalit)

Wayni’ng Gintung Pluma, Capas menibatan
Amana ning Anac, cang Ibpang Ibatan
Anac ngeni Watas, cayang Pacamalan
Tiru nang Tatang na, e na Acalingwan
Uling Pamana lang diling Cayamanan
Licwan na king Yatu a dapat Lingapan.

Deta nang Amanu, aliwa la Uru
Danum misnang linis, king Sibul tinulu
At deng macainum, malagad lang tutu
Meging Gintung Pluma, ning Laji tang bigu
Ngeni macapase a anting calulu
Manayang lingapan, malugud mung Pusu.

Macanyan man Balen, E migaganaca
Ytang Amanu mu, malyari ni’yang bula
Uling ding Sapni mu, ngeni magtumayla
Yla ding gagambul, sisesen king Tula
Gintung cawatasan, mitanam, mipunla
Metibe la Yamut, at e na miragsa.

Agyang nang Siguada, ngeni caya Miras
Deng Anac ning Daji, e na la Mamatras
Misasanmentung la, ibwat da cang Matas
Maging Cabilian mu, ala nang Apintas
Maningning mung Cule, e biasang Cumupas
Anting Plumang Gintu, a mal da ring Pantas.