malsinta cu queca

17/06/2018

cauatasan capampangan

cabug ning pusu@siwalangsinukuan

cabug ning pusu@siwalangsinukuan

 

malsinta cu queca
irvin harvey rivera (siuala ning maliwalu / anac ning baculud)

Mibatanglauan la ring adua cung mata
Aniang iquit que ing quiquinang mung lupa
Ding mata mung isic tutung pamitan la
Ania, dacal la ring mica-buri queca.

Istung ding mata mu cacu la milaue
Gagalgal na cu at sumpung na cu dine
Nanan cu mang lisia qng dalan mamacle,
O’bat icang pane cung acacasabe?

Tutu na ia ta qng dacal na sasabi
Ing tantu cang maiap at simpling babai
Dacal no sigurung maglolong Lalaqui
At susuiu quecang mamanic neng bengi?

Dapot ia cu rugu qng binang masaclo
Pagloluan da ca sa’ qng misan a aldo
Oneng maina cu lub anting papapiglo
Laue mu mu cacu e na cu migalo?

Ania, sa qng ba’mung aquit at abalu
Ing tantung laman na niting cacung pusu
E na cu dacal pang iaiapseng pangacu
Qng ba’mung atalus, sasabi cung tutu.

 


 

Advertisements

ortilanu / bakuleru / ubreru

16/06/2018

cauatasan capampangan

gagauang bale@siwalangsinukuan

obreru@siwalangsinukuan

 

ortilanu / bakuleru / ubreru
eduardo bagtas garcia

Santungan da reng asan talyasi ya kabud mutya.
Mutya deng ayup at lasip mitupa ampong dumara.
Dumara sungab mung sungab king butaris e mibata.
Mibata ka wari lunac manyampukaki a grasya.
Grasya’t pibandian tatangis king gambul Yu manenaya.
Manenaya ing indu karing mibaligo’ng suli na.

Suli na pamitan miatna keyang pangapase.
Pangapase menandaman ot memangi ngan king dase.
Dase ning bayung kabiasnan laun ugali papate.
Papate king amanung sisuan reng palipi nang luse.
Luse medunut kabalwan ning atbang ilug mipakde.
Mipakde ing leguan karing alwa amanu a apse.

Apse balen ngeni anti pipit loru ding misabi.
Misabi at galamanu Deng balid ampo gaguti.
Gaguti ra subuknan Yu asna nu man king taloti.
Taloti na’nu mu ita pakiabaran parati.
Parati buru mamangan e re Balu ing balari.
Balari apin Abu fiesta semutanan mung nasi.

Nasi kanu ing lumwal sugat ning anac a beligo.
Beligo mu kanita angga man ngeni akwa metuno.
Metuno anti’ng pale kabang ume pamu sasapo.
Sasapo’t mibabait nang datangan na’ning peligro.
Peligro KU mangadi king guinu manyawad milagro.
Milagro mu Naman ring kayanacan bitis ra tikdo.

Tikdo king karanun akit mu apin ring ortelanu.
Ortelanu ding watas kayabe lele bakuleru.
Bakuleru’ng asan ampang ra karing sabla’ng ubreru.
Ubreru ning balen pakawasa king aluagi’t gosu.
Gosu ring memalen sisyo pulosa nang totoy Batu.
Totoy Batu dindam ke kapamilatan ning apu ku.

 


 


caring quecang tacde

16/06/2018

cauatasan capampangan

catauan@siwalangsinukuan

tacde@siwalangsinukuan

 

 

caring quecang tacde
remegio ‘jhong’ magcalas (balawe ning gatiawin)

*
Ibat pa quing cabait cu Yca na ing megi’ng gabe
Canita pang pacalampin cu at ala cu pang male
Atyu ca lagi siping cu e’ sasawa’ng manalale
Angga na quing linacad cu at tinicdong masalese

**
E’ cu acalinguan ing aldo abe ra cang manasan
Queta’ng gulut na ning mula,lalam da retang cuayan
Mangalati la’ng malbang a pegtiyagan mo’ng quilculan
Nung nu’ caybat ning cauran quecata la’ng lilimasan

***
Tuqui-tuqui cami ‘nyang atyu pa ing quecang asican
Babo da ring pilapil mananabu e’cu milacbang
Caras mi quing cubo agad da na ca mo’ng pangulaytan
Dimla na ing cape,”Tang mekeni na ba ta’nang mangan”

****
Caba’ng daragul cu lalawen mu ing sabla cu’ng galo
Egana-gana binye mu ngan sobra na anggang pago
Yca ing meging guyabnan ning diua cung susulapo
Ngeni reti ilang maging sicanan ba cung miticdo

*****
Ing buri cu abe misan a aldo ngamung sinabi
Potang miras na ing aldo at mawala na que queti
Ninu man tau quecayu ala la sanang asabi
Ban canita e ra asabing mabuluc ing liquan mi

******
Queca mal cu’ng Tatang,utang mi ya ing quecaming bie
At potang miras na ing miquit cata aliwa’ng bie
Quing arapan ning Guinu ibalic cu queca ing puge
At carin cu iyampang queca ing lugud cung dalise

 


 


poesiang putut-putut

16/06/2018

cauatasan capampangan

tali, gapus©siwalangsinukuan

putlud; putut©siwalangsinukuan

 

poesiang putut-putut
john bendido

Ining poesia cu, poesia putut-putut,
Ini Belangcas que, queng bolpen cung putut,
Ginamit cung papil, ielou pad iang putut,
Sulu cung masala, bigla iang meputut,

Caputut iang bangcu, ing cacung luclucan,
Ing lamesa cu, caputut ia naman,
Bigla iang meputut, poesia cung gagauian,
I Doming a putut, bigla iang dinatang,

Pequilaban que, poesia cung putut,
Aniang ating contest, quing calsada putut,
Meputut la tula, at biglang melungcut, Ing contest meputut, mitucnang na cabud,

Ing canacung piniambut, caputut iang atbu,
Caputut iang palang, itang penalip cu,
Caputut a tabu, ing piangusan cu,
Caputut a suput, ing pibalutan cu,

Minta nacuman, queng putut a sapa,
Ing darala cu, caputut iang pana,
Caputut iang asan, ing canacung icua,
Caputut a suweque, carin dinapuc ia,

Inuli cu nenam, queng putut a cubu,
Cawali iang putut, ing pipaglutuan cu,
Caputut iang dutung, itang penangab cu,
Calang iang caputut, ing pitangaban cu,

Ginamit cung sanduc, caputut ia naman,
Tsaka que dinapuc, queng putut a pinggan,
Tsaka que inapag, queng putut a dulang,
Ing pusa cung putut, teginis naneman,

Penagal quepin, ing pusa cung putut,
Sabe iang quinaung, ing asu cung putut,
Eco mabibitin, bigla iang maputut,
Ining poesia cu, poesia putut-putut.

 


 


sapatus nang tatang

16/06/2018

cauatasan capampangan

Untitled

sapatus; sapin@siwalangsinukuan

 

sapatus nang tatang
renato b. alzadon

King Eskwelang Baryu, misan king pabanua
yutus ning ugali ating pamanyara.
Ketang balcunaje ning matuang eskwela
caring magaganap ing peca-programa;
at king programang yan ati nang magcanta
atin nang teterac, atin nang magdrama
atin magsalita caretang bisita
at atin mu naman gagale poesia.
*
At misan a banua– e na calinguan cu–
king bayung programa macacayabe cu
acung titucan na ning cacung maestru
migale poesia arapan ding tau,
atmu ne catula ing mal a ibpa cu
king abalitan nang mitutuc canacu
uling ing poesiang pagale ra cacu
ya ing “Ortelano”….guewa neng tatang cu.
*
Canita, Y Tatang, bulalag yang watas
ya ing mekilalang Poeta Ning Capas,
bucud king panyulat mapinu yang migcas
pakiyagape re caring suguing magcas,
tinap-tinapan nang caring aldo bucas
atin sang anac na a caya makiabas
inya ing tula na alang acatumbas
ngening amasid nang tutukyan ke bacas.
*
Cabang magsane cu king kimut at gale
Ing Poetang Tatang yang maca-alale
makikiramdam ya king palilelele
sangcan nang manyiklat king suluc ning bale;
potang mayari cung caya na lumele
pulis-pulisan na pawas na king kile
alus itang lua na maibug nang mangale
ketang cayang tulang alang acayarle.
*
At misan Y tatang nganang migsalita
king daramdaman na ning canacung ima
“potang migale ca arapan ding malda
e mo susulud ding sapatus mung sira
icua ra cang bayu —itang macayacma—
sapatus a balat—sapatus macudta . . .”
King dimdam cung ita at nacu catula
“Esco” o “Ang Tibay” casanting da ata.
*
Agyang nanan cu man, ilang isipan cu
ding bayung sapatus a paninapan cu,
casanting da yata, ngacu mo keng lub cu
mapalad cung dili caring cayabe cu,
ila isulud da -de-goma mung piju
acu balat no mang aliwa istilu,
iti, sapatus de ding magcas king bersu,
Sapatus de retang pantas king amanu.
*
Ing aldo mitacda cabud na dinatang–
Oita, sicdan na cu talampacan, tatang,
saca ya tinipa– e na cu mengutang
panayan cu na mu nung nanu ing datang,
at inyang muli ya, Y ‘Ma yang mengutang
“An’to ding sapatus?” Ing tambing nang kitang.
Nga na ning Tatang cu, “E cu mecautang
E la pa minuli di Cumaring Bentang.”
*
Oyan ing salpac na ning bie ring Poeta
ding menasa caren maluca ing bie ra,
at ining Tatang cu metung ne carela
king pamangailangan manamdam yang pera;
dapot macanian man, agyang calulu ya
ing cayang pibandian ya itang lagyu na
maslag yang brilyanteng atyu king canuan na
antimong macudta ning indung balyan na.
*
“Macananu canyan?” Ing kitang ning Ima.
“Yana, gayac tana.” Timbayan ning Ibpa.
King malating cwartu mine yang malagwa
at binie ne cacu ing cajun nang kinua
inyang ibuclat ke misdan cu’t mebigla
ding canacung ikit sapatus lang adua
kikinang la dening sapatus macudta
ninu tang sumabing sapatus lang luma.
*
Maca-calesa keng mine king tetagan
case, e ra cu pin buring palacaran,
uling ding sapatus milamnan nong basan
at dobli-dobli no ding medyas cu canian,
agyang ding tali na pacatigik co man
e ro cayacma ding cacung talampacan,
ketang degulan da balang calacbangan
babacle cung bitis mamalis lang dalan.
*
Inyang manic na cu ketang balcunaje
ing gamat nang tatang yang macayantabe,
pena-penandit pa ding maldang manalbe
pepatajimic no ning canacung gale,
cabud cayari cu Y tatang ikit ke
cayabe re detang papacpac magcainge,
ken cu mipatacbang ban sang puntalan ke
ing bitis cung wanan canian ne migbacle.
*
Mewala cu timbang king pangatakid cu
inya ketang eran miggulunggulung cu,
salamat, asapu nacu ning Mestru cu
at ala cung sugat king panganabu cu;
ing milyaring iti, aral ya canacu,
aral yang mitanam king catandanan cu;
misan, ginale ke poesia nang Tatang cu
at ding sapatus na ilang sinulud cu.
*
Panaun miglacad, king mayap a calma
meragul cung meguing metung a macudta;
caring sinulat cu malda lang memasa
dimdam ne ning balen ing cacung siwala,
dapot macanian man caring mausisa
anac, e milimpi king beluan ning Ibpa
uling king ubud na ning pusu ring malda
ing Poetang Tatang atin neng dambana.
*
Ala ne Y tatang, meco neng tibubus
dapot ing lagyu na e pa mipdang lubus,
caring makibalu a cayang keyutus
ing cabantugan na e na ta mapupus,
bilang keyang supling king rima mamuntus
e cu pagnasan man ing caya miyapus,
uling ating aral….subuc cu ne’t talus
itang degulan na ning cayang sapatus.

 


 


maningning nang leguan ning balen baculud

16/06/2018

cauatasan capampangan

ing bunduc queng aslagan @siwalangsinukuan
ing bunduc queng aslagan @siwalangsinukuan

 

maningning nang leguan ning balen baculud
irvin harvey rivera (siuala ning maliwalu / anac ning baculud)

Luid ca! Oh Balen cung tutung pacamalan
Talacad na ca qng matindag mung leguan
Saganan mu la ring batuin qng catasan
Miumang tinipa at caiabe ning bulan.

Lubasan me’yng quecang mapait mung tangis
Malungcut mung gale caring rima’t sunis
Ibalic mu la ring maiumu mung lambis
A misimpan-simpan qng lugma mu’t aclis.

Ing mau mung pusung manaptas paninap
Ala iang patna qng caiang pamagdulap
Ding masalang batuing migpanpan qng ulap
mengatda la ningning qng dudul at quildap.

Yng dati mung leguan at matibeng asias
Lesac ne ning quecang malungcut a paldas
Istung balang ume cang sambitla’t guingcas
Sasaguiua ngan ing sablang mengalabas.

Dapot qng maraiu mu nang pamaglacbe
Minuli cang masias at meguing matibe
Acacaquit cu’yng sala at ningning mung tagle
Caring quecang timan, dalit mu at gale.

Ume cang talacad dane ning aslagan
Manaptas paninap ampo pang taguimpan
Masalese mu lang piabaiabaian
Ding batuing masala, sumlag la mu naman.

 


 


amanu nang ibpa

16/06/2018

cauatasan capampangan

mimisip, manguibalac©siwalangsinukuan

ibpa; tatang©siwalangsinukuan

 

amanu nang ibpa
bertung isponga

Deni nang amanu a kakung sambitlan,
Magsilbi lang aral a kekang bakalan.
Ban nanu mang laban a kekang sulungan,
Matibe yang armas ing kekang daralan.

Manibat minuna ing kakung pengaku,
Arap naning altar ning kekatang Guinu.
Kaku yang talakad ining pamilya ku,
Masakit, kanawan, maldo ma’t babagyu.

Ing kanakung papel anti mong pundasyun,
Tikdo kung matibe nanu mang panaun.
Kawlan kung matigik ini nang relasyun,
Anti ning pangakung kanakung dinaun.

Agyang masakit na laman ku gagalgal,
Ing sikanan lub yang kakung pairal.
Uling kaylangan ku ita nang gumusal,
Maski ing katawan mate na king pagal.

Deni nang amanu mengari mong bini,
Kaku lang isalbag anti mong pengari.
Potang tumubu la mayap lang manyuli,
Ban potang mamupul mabunga lang pilmi.

Uling deng amanu a kakung inabse,
Kaku lang delanan kening pamaglakbe.
Kanakung pinulut deng mayap a bage,
At itang marawak kanakung inugse.

Deni sang amanu kekang pakamalan,
Uling deti ila ding kekang gamitan.
Ilang kekang gabe keng bie mung arapan.
Ban kang e malili keng kekang dalanan.

Nya panabilin ku kekayung anak ku,
Luguran ye sana ita nang Indu yu.
Papanatilyan ing pamikakasundu,
Pakamalan yu sa migit pa keng guintu.