tagimpan ding talaturu

tuturu@siwalangsinukuan

 

tagimpan ding talaturu
— babaing matun

i
Sinabi nang Jose Rizal e ye dapat kakalingwan,
“Nga na deting kayanakan pagasa no ning balayan”,
kanita man angga ngeni iyang atiu king tagimpan,
ning metung a talaturu king mialiwang larangan.

ii
Nung wari itang sala yu anting bayung saslag aldo,
ikayu ding babie kislap keti sulip at king babo,
king dulum na ning kabengian tala ko king ganingaldo,
ing magpakayap king bangsa a malambat nang papiglo.

iii
Ding kekayung pipunpunan matenakan la’t matapat
king balen ding Kapampangan ila detang pekawakat
ding Apu yu Ingkung, Tata… sinerbisyu lang maiatiat
ilang bukud yung pamulian ketang matulid dang dapat.

iv
Magsikap kayu sa anak ing paninap mikalugal,
karing pusu at isip yu mitanam kayung masabal,
ban kanita itang lua da ampon pawas a migsilual,
e mu miugse’t masayang,dumagus mu karing kanal.

v
Ba’rang lalung pakislapan itang masapsap dang nasa,
pibabatan da ing pagal agiang maybug nong mangaga,
uling king pilubluban da apabiasa da kayu sa,
iyang sumpa da king Balen ban akua nang
misaplala.

vi
Alang narses, arkitektu, doktor ,inyeru, abogadu,
o maski nanung propesyun atin mabilug a yatu,
a e tinuklung iskwela , tinalan lapis at libru,
tiruanan da di ser at mam makapamasang alpabetu.

vii
Inya magparalampu ku kekayu o kayanakan,
dening anggang talaturu anting pengari, luguran,
uling daka’la kekayu ‘bata yulang pasakitan,
lulugud mung anggang binit akua yu pang babastusan.

viii
Aku na pang manimuna kaybat anak pangaduan yu,
itulid ta’ ing kamalian king ugaling makaustu,
mapse tamung pasalamat karing kaduang Indu tamu,
ilang sampaga king jardin magpalagu, magpabanglu.

ix
King aldo ding Talaturu karela sukat ta’ng ibie,
matua ampon kayanakan malakpak tamu’t mamugue,
karing bayani ning bangsa taimik mung atsu lele,
panalangin ta’ king GUINU dina’nalang makabang bie.

x
Ipakit yu kayanakan ikayu pin ing pagasa,
ning kekatang indung balen king paintungul a bukas na,
magsamas king pamagaral pakikuanan yung mabiasa,
ing mayap a pamagsilbi pamisan yung ibie kaya.

 

---