king pamagpabaya nang Jimmy

cauatasan capampangan

miminum, maglasing©siwalangsinukuan

miminum, maglasing©siwalangsinukuan

 

king pamagpabaya nang Jimmy
tsokolating lagu-lagu

king mura nang isip , at idad nang kinsi,
ining dalagitang , king lagyu a Joni,
king siping nang bale , milsinta ya iti ,
alang aliwa pa , nune pin kang Jimmy.

I Jimmy matua ya , mapilan a banua,
inya ikit ne yan , inyang malati ya,
king apulung banua , o kaya migit pa,
inya é aliwa , ing turing na keya.

King misang a aldo , sinulat ya’y Joni,
inabut ne iti , kening mal nang Jimmy,
“inten mukung dagul , datang murin iti “,
“dening kakung uma , keka lamu reti”.

Binasa neng Jimmy , gagkas malumane,
kaibat linipat ya, king sumangid bale,
kabang ining Joni , mata na mengale,
tinulu ing lua na , é maybug mipakde.

Nganang Jimmy kaya , Joni ..é ka kikiak,
kalinguan muku rin , karas naning bukas,
uling ana’ka pa , matua kung é palak,
é ku apanaya , é na ka magmasias.

ining Jimmy

Dintang ing pinandit , meko ku baleyan,
king awus ning obra , karin mamilmiyan,
kilub limang banua , ing kakung pibatan,
ining kakung isip , i Joni ing laman.

Ing sabi nang Joni , kaku ya manaya,
subukan ku ngeni , nung ya , atyu yapa,
nung pin atyu yapa , tapat kuna kaya,
ing lama’ning lub ku , ibye kune kaya.

Ibalut ku nangan , yang kakung imalan,
ing mumunang byahi , dapat keng tagalan,
ining kakung Joni , sabik keng kaulan,
kareng kakung takde , tsaka ke panuman.

Ining kikimkiman , maluat nang panaun,
kening kakung dapat , nu na memagluyun,
kabang pantunan ku , nu ku pa misantung,
kang Joni mu pala , papunta ing layun.

Ngeni balikan ke , kaya ku sumuyu,
gawan at gawan ku , ining kakung agyu,
nung é kalabisan , puersan ku neng tangu,
banting misan metung , no reng kekeng pusu.

Kabang mimisip ku , king buri kung gawan,
miras na ku pala , é ku amalayan,
kalub ku karela , ali ku ne disan,
at pengutang ku ne , nu ya menuknangan.

Nung nu daku tiru , karin na ku minta,
ala lang sasabyan, nang milyari kaya,
inya ya ku naman , masaya ku asta,
uling akit ku ne , ining kakung sinta.

Mabilis kung dintang , king kayang karinan,
kayakit na kaku , ‘gad nakung sebyanan,
Jimmy , it’s been five years , since you been gone“,
Jimmy … I just married , your best friend John“.

Kening kakung dindam , agad kung mipakiak,
timbuk ke ing pader , tsaka gugulisak,
Joni.. Joni… Joneeee…kasakit mu depat,
mapang ing pusu ku , é ku ne sa biklat !

Ngeni ku atakman , ing pelasa keka,
inyang gumulut ku , kaku manangis ka,
king é ku sasaryan , at balikan da ka,
ala na … ala na… ala na ka pala!

 


 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: